زانکۆی جیهان-هەولێر سەرکەوتنێکی بەرچاو لە ڕیزبەندیی نێودەوڵەتی تایمز بۆ وڵاتانی عەرەبی بۆ ساڵی ٢٠٢٦ تۆمار دەکات
زانکۆی جیهان-هەولێر لە ڕیزبەندیی “تایمز” بۆ خوێندنی باڵا (Times Higher Education) لەسەر ئاستی زانکۆکانی وڵاتانی عەرەبی بۆ ساڵی ٢٠٢٦، پێگەیەکی پێشکەوتووی بەدەستھێنا و توانی لەسەر ئاستی ھەرێمی کوردستان پلەی دووەم مسۆگەر بکات.
لە پێشهاتێکی چاوەڕواننەکراودا، زانکۆ تایبەتەکان باڵادەستییان بەسەر ڕیزبەندییەکەدا گرتووە و پێش زۆرێک لە دامەزراوە حکومییە گەورە و دێرینەکان کەوتوون. زانکۆی جیهان-هەولێر لە ڕیزبەندیی (١٠١-١٢٥) جێگیر بووە بە کۆنمرەی گشتیی (٢٩.٧-٣١.٨). زانکۆکە لە چەندین پێوەردا ئاستێکی بەهێزی نیشانداوە، بەتایبەتی لە بواری “کوالیتی توێژینەوە” (٥٩.٧) و “ڕوانگەی نێودەوڵەتی” (٦١.١).
ئەم دەستکەوتەی زانکۆی جیهان-هەولێر بە هەنگاوێکی گرنگ و جێی سەرنج هەژمار دەکرێت، بەو پێیەی پێش چەندین زانکۆی گەورەی حکومیی عێراق کەوتووە کە لە ڕیزبەندییەکەدا لە ئاستیکی زۆر نزمتردا هاتوون. ئەم سەرکەوتنە ڕەنگدانەوەی پابەندبوونی زانکۆی جیهانە بە باڵایی ئەکادیمی، داهێنان لە توێژینەوە و هەماهەنگیی نێودەوڵەتی.
لەو بارەیەوە سەرۆکایەتی زانکۆ ڕایانگەیاند: “ئەم ڕیزبەندییە بەڵگەیە لەسەر دروستیی دیدگە ستراتیژییەکەمان و دڵسۆزیمان بۆ پێشکەشکردنی خوێندن لە ئاستێکی جیهانیدا. ئێمە شانازی دەکەین کە پێشەنگی زانکۆکانی کوردستانین و پێوەرێکی نوێ بۆ خوێندنی باڵای تایبەت لە عێراقدا دیاری دەکەین.”
ئەم ڕیزبەندییە بە پشتبەستن بە پێنج پێوەری سەرەکی هەڵسەنگاندنی بۆ زانکۆکان کردووە، کە بریتین لە: ژینگەی وانەوتنەوە، ژینگەی توێژینەوەی زانستی، کوالیتی توێژینەوە، پەیوەندی لەگەڵ کەرتی پیشەسازی و ڕوانگەی نێودەوڵەتی.
بەم دەستکەوتە، زانکۆی جیهان-هەولێر بەردەوامە لە پتەوکردنی پێگەی خۆی وەک دامەزراوەیەکی ئەکادیمیی پێشەنگ لە ناوچەکەدا، بەمەش دەبێتە جێی سەرنجی ئەو فێرخواز و ئەندامانەی دەستەی وانەوتنەوە کە بەدوای خوێندنی بە کوالیتی و دەرفەتی توێژینەوەی کاریگەردا دەگەڕێن.
