زانکۆی جیهان-هەولێر گەورەترین پیشانگەی هەلی کاری بە بەشداریی ٥٠ دامەزراوە و کۆمپانیا بۆ دەرچوان و فێرخوازان كردەوە
بۆ كارئاسانیكردن بۆ دەرچووان و فێرخوازان و ڕەخساندنی دەرفەتی كار، زانكۆی جیهان-هەولێر گەورەترین پیشانگەی هەلی کاری بە بەشداریی ٥٠ دامەزراوە و کۆمپانیا بۆ دەرچوان و فێرخوازان كردەوە.
ئەو پیشانگەیە، كە لەلایەن پرۆفیسۆر دكتۆر ئەمجەد سابر دەلۆ سەرۆكی زانكۆی جیهان-هەولێر و، دكتۆر نەوزاد یەحیا باجگر سەرۆكی دەستەی ئەمینداریەتی زانكۆ و پەیمانگەكانی جیهان كرایەوە، ژمارەیەكی زۆر لە دەرچوان و فێرخوازان و گەنجان ئامادەیبوون، لە میانەی بەسەركردنەوەی بەشە جیاوازەكانی پیشانگەكەدا سەرۆكی زانكۆی جیهان-هەولێر و سەرۆكی دەستەی ئەمینداریەتی زانكۆكانی جیهان لە نزیكەوە ئاشنای كاروباری كۆمپانیا و دامەزراوە جیاكان بوون، هاوكات گفتوگۆیان لەبارەی ئەو دەرفەتی كارانە كرد، كە بۆ دەرچووان و فێرخوازان لە بوارە جیاوازەكان ڕەخساندویانە، بۆ ئەوەش تەئكیدیان لە ئاستی لێهاتویی و توانا و شارەزایی دەرچوانی زانكۆی جیهان-هەولێر بەپیێ پسپۆڕییەكان كردەوە.
لەو پیشانگەیەدا، كە ڕۆژی پێنچ شەممە ڕێكەوتی (27/11/2025) لە نێو کەمپ و هۆڵەکانی زانکۆی جیهان-هەولێر بە سەرپەرشتی ڕاستەوخۆی سەرۆکایەتی زانکۆ و، بە هەماهەنگیی نێوان “کۆمەڵەی دەرچووان” و “بەشی ڕاگەیاندن”ـی زانکۆ كرایەوە، زیاتر لە ٥٠ کۆمپانیا و دامەزراوەی بەناوبانگ لە کەرتە جیاوازەکانی بازرگانی، پیشەسازی، خزمەتگوزاری و ڕاگەیاندن بەشدارییان تێدا كرد. لەم پیشانگەیەدا دەرچووانی زانكۆی جیهان-هەولێر و فێرخوازان توانییان پەیوەندی ڕاستەوخۆ لەگەڵ خاوەن کار و بەڕێوەبەرانی سەرچاوە مرۆییەکان دروست بکەن، “سی ڤی” و پوختەی چالاكی و توانا و شارەزایی و كارەكانیان پێشکەش بکەن و چاوپێکەوتنی سەرەتایی ئەنجام بدەن.
هاوكات پیشانگەكە بووە دەرفەتێكی گرنگ بۆ دەرچووانی زانكۆی جیهان-هەولێر و فێرخوازان بۆ لە نزیكەوە ئاشنابوون بە سروشتی ژینگەی دامەزراوەکان و دروستکردنی تۆڕێکی پەیوەندیی پیشەیی فراوان لەگەڵ دامەزراوە و کۆمپانیا کاراکانی هەرێمی کوردستان، هەروەها پیشانگەکە بووە دەرفەتێکی زێڕینی بۆ فێرخوازان ڕەخساند بۆ ئەوەی لە نزیکەوە ئاگاداری ئەو لێهاتوویی و توانا تەکنیکی و کەسییانە بن، کە كۆمپانیا و دامەزراوە مۆدێرنەکان داوای دەکەن، ئەمەش یارمەتیی دەر بوو بۆ پەرەپێدانی توانا كەسییەكان و ئاڕاستەکردنی ڕێڕەوی خوێندن و ڕاهێنانیان بە شێوەیەک کە لەگەڵ ئەم پێداویستییانەدا بگونجێت.
