سەرۆكایەتیی بەشی ڕاگەیاندن بە چەند چالاكییەكی هونەری بەشداری لە هەڵمەتی بەرەنگاربوونەوەی توندوتیژی دژی ئافرەتان كرد
بە ئامادەبوونی هەریەكە پڕۆفیسۆر دكتۆر ئەمجەد سابر دەلۆ سەرۆكی زانكۆی جیهان-هەولێر، دكتۆر نەوزاد یەحیا باجگر سەرۆکی دەستەی ئەمیندارێتیی زانكۆ و پەیمانگەكانی جیهان، مامۆستای یاریدەدەر ئەزوەر قاسم ئاغا سەرۆكی بەشی ڕاگەیاندن و، بەبۆنەی هەڵمەتی شانزە ڕۆژەی بەرەنگاربوونەوەی توندوتیژی دژی ئافرەتان، چەند چالاكیەك بەڕێوەچوو.
لەو چالاكیانەدا، كە ڕۆژی چوارشەممە ڕێكەوتی 26-11-2025 لەنێو كەمپی زانكۆی جیهان-هەولێر بەڕێوەچوو، چالاكیەكان لەلایەن سەرۆكایەتیی بەشی ڕاگەیاندن بە هەماهەنگی هەردوو ڕێكخراوی (كوردستان فۆتۆ) و رێكخراوی (ڕێپاك) ڕێكخرابوو، ژمارەیەكی بەرچاو لە فێرخوازانی زانكۆ ئامادەیبوون، لەسەرەتادا شانۆگەرییەك بەناونیشانی (شكاندنی ئاوێنە) نمایش كرا، ناوەڕۆكەكەی گوزارشتی لە دەربڕینی دەنگ، هێز و وشەی ئافرەت دەكرد، کە پێویستە دەنگی ببیسترێت و وشەکانی جێ بگرن، هەروەها سەرجەم ئەو ڕێگریانە بشکێنن كە دەخرێنە بەردەم دەنگ و ئاوات و خولیاکانیان.
لە بەشێكی دیكەی چالاكییەكاندا، پیشانگەی فۆتۆگرافی تایبەت بە (هێرش غەفور) و پیشانگەی شێوەكاری بۆ (دنیا سەباح) كرایەوە، ناوەڕۆكی هەردوو پیشانگاكە گوزارشتیان لە نیشاندانی كاریگەرییەكانی ئەو توندوتیژییانەی دەكرد، كە بەرامبەر ئافرەتان دەكرێن.
لە میانەی بەسەركردنەوەی پیشانگەكان و ئامادەبوون لە نمایشە شانۆییەكە، پڕۆفیسۆر دكتۆر ئەمجەد سابر دەلۆ سەرۆكی زانكۆی جیهان-هەولێر، دكتۆر نەوزاد یەحیا باجگر سەرۆکی دەستەی ئەمیندارێتیی زانكۆ و پەیمانگەكانی جیهان دەستخۆشیان لە هونەرمەندان و فێرخوازان كرد، هەروەك پاڵپشتی سەرۆكایەتی زانكۆیان بۆ دابینكردنی مافەكانی ژنان و بەدیهێنانی داواكانیان كردەوە.
