فێرخوازانی بەشى ئەندازیاری دیزاینی ناوخۆیی سەردانی ماجدی مۆڵ دەکەن

ڕۆژی سێشەممە، ڕێکەوتى ٢٥/١١/٢٠٢٥، گروپێک لە فێرخوازانی قۆناغی سێیەمی بەشی ئەندازیاری دیزاینی ناوخۆیی لە زانکۆی جیهان-هەولێر، گەشتێکی مەیدانیان بۆ فرۆشگەکانی جلوبەرگ لە ناو ماجدی مۆڵ ئەنجام دا.

سەردانەکە بە سەرپەرشتیی مامۆستای یاریدەدەر (لانە شەهاب ئەحمەد) بەڕێوەچوو، بەگەیشتنیان فێرخوازان لەلایەن (ڕێناس محەمەد کەریم)ـەوە پێشوازییان لێ کرا، پاشان پێشەکییەکی دەربارەی ژینگەی کار لە ناو فرۆشگەکاندا پێشکەش بە فێرخوازان کرد، هاوکات بنەما سەرەکییەکانی کارکردنی فرۆشگەکانی جلوبەرگی ڕوون کردەوە، وەک: جووڵەی سەردانیکەران لە ناو فرۆشگە، ستراتیژییەکانی ڕووناکی، شێوازەکانی ڕێکخستنی بەرهەمەکان و تەکنیکەکانی نمایشکردنی بینراو (Visual Merchandising)، کە بۆ ڕاکێشانی کڕیاران بەکاردێن.

لە میانەی سەردانەکەیاندا، فێرخوازان تێبینیی توخمە گرنگەکانی دیزاینی ناوخۆییان کرد، وەک هەڵبژاردنی کەرەستەکان، هەماهەنگیی ڕەنگەکان، سیستمی ڕەفەکان و، چۆنیەتیی تێکەڵکردنی ناسنامەی براند (Brand Identity) لەگەڵ بۆشاییە بازرگانییەکاندا. هەروەها فێرخوازان هاندران بۆ شیکردنەوەی کاریگەریی بڕیارەکانی دیزاینی ناوخۆیی لەسەر ئەزموونی کڕیار و ڕەفتاری کڕین.