فێرخوازانی بەشی زانستی کۆمپیوتەر بە سەردانێکی مرۆیی نەخۆشخانەی نانەکەلی بەسەردەكەنەوە

وەک ڕەنگدانەوەیەک بۆ دیدگای زانکۆی جیهان – هەولێر لە کۆکردنەوەی خوێندن و ئەرکی مرۆیی، شاندێکی بەشی زانستی کۆمپیوتەر لە زانکۆی جیهان–هەولێر، ڕۆژی دووشەممە ڕێکەوتی (24/11/2025) سەردانێکی مرۆییان بۆ نەخۆشخانەی نانەکەلی بۆ نەخۆشییەکانی خوێن و شێرپەنجە ئەنجامدا.

لەم دەستپێشخەرییە مرۆیی و زانستییەدا، فێرخوازانی قۆناغی دووەم و سێیەمی بەشی زانستی کۆمپیوتەر بەشدارییان کرد، بە سەرپەرشتیی مامۆستای یاریدەدەر سارا جەمال حوسێن. لە میانەی سەردانەكەیاندا فێرخوازان پاڵپشتیی مەعنەوییان پێشكەشی نەخۆش و چارەسەرخوازان كرد بەتایبەتی منداڵان، لەگەڵ بەرزکردنەوەی هۆشیاریی مرۆیی و کۆمەڵایەتی لای فێرخوازان و بەستنەوەی لایەنە تیۆرییەکان بە ئەزموونە واقیعییەکانەوە. شاندی زانکۆ لەلایەن جەلال مەحموود، سەرۆکی پەرستارانەوە پێشوازییان لێکرا و، کورتەیەکی دەربارەی سروشتی کاری نەخۆشخانەکە و خزمەتگوزارییە پزیشکی و مرۆییەکان خستەڕوو.

لە میانی سەردانەکەدا، فێرخوازان دیارییان بەسەر منداڵانی نەخۆشدا دابەش کرد و، بەشدارییان لە ساتەکانی خۆشی و پاڵپشتیی دەروونییان کرد، کە ئەمەش هەنگاوێکی مرۆیی بوو و ڕەنگدانەوەی گیانی هاوکاری و سۆز بوو، هەروەك بووە هۆی خۆشحاڵکردنی منداڵان و خێزان و كەسوكارەکانیان.