فێرخوازانی کۆلێژی دەرمانسازی بە سەردانێكی زانستی بۆ دەستەی کۆنتڕۆڵی جۆریی دەرمان (KMCA) ئەنجام دەدەن

لە ڕۆژی چوارشەممە ڕێکەوتی  26/11/2025، فێرخوازانی قۆناغی سێیەمی کۆلێژی دەرمانسازی لە زانکۆی جیهان-هەولێر، سەردانێکی مەیدانی فێرکارییان بۆ دەستەی کۆنتڕۆڵی جۆریی دەرمان (KMCA) لە هەولێر ئەنجام دا.

سەردانەکە بە سەرپەرشتی مامۆستای یاریدەدەر “دکتۆرە گەلینا عەبدوڵڵا” بەڕێوەچوو، لە کاتی گەیشتنیاندا، شاندەکە لەلایەن “سەردار سەلیم” بەڕێوەبەری کارگێڕی و “عیسا ئازاد”ـەوە پێشوازییەکی گەرمیان لێکرا. پاشان عیسا ئازاد هاوەڵی فێرخوازانی كرد بۆ بەسەركردنەوەی بەشە جیاوازەکان و تاقیگە پسپۆڕییەکان، لەو چوارچێوەیەشدا ڕوونکردنەوەی وردی دەربارەی پرۆسەکانی هەڵسەنگاندنی ورد کە بۆ هەموو جۆرەکانی دەرمان ئەنجام دەدرێن، پێشکەش بە فێرخوازان کرد.

بۆ ئەو مەبەستەش باسیان لە چۆنیەتی بەراوردکردنی نموونەی دەرمانی نەناسراو بە شێوەیەکی زانستی لەگەڵ سەرچاوە پێوانەییە پاکەکان (Standard References)كرد، هەروەها پڕۆتۆکۆڵەکانی تایبەت بە وەرگرتن، پشکنین و دانانی نیشانە لەسەر دەرمانی هاوردەکراو ڕوونکرایەوە و، جەخت لە گرنگیی هەڵگرتن لە پلەی گەرمیی کۆنترۆڵکراودا کرایەوە بۆ پاراستنی سەلامەتی بەرهەمەکان.

هەر لە میانەی سەردانەکەیاندا، فێرخوازان ئاشنای ڕێکارەکانی پشکنینی فیزیایی، کیمیایی و بایۆلۆجی بۆ بەرهەمە دەرمانییەکان كران، هاوكات گرنگییەکی تایبەتیش درا بە ڕۆڵی ئامێری (HPLC) وەک ئامرازێکی بنەڕەتی لە شیکردنەوەی دەرمانی دروستکراو و بەرهەمە گیاییەکان.