بەشی بایۆلۆجیی پزیشکی وۆرکشوێپێکی دەربارەی بەرگریی دژەزیندەکانی بەڕێوەبرد

لە ڕێکەوتی 26/11/2025، بەشی بایۆلۆجیی پزیشکی (Medical Microbiology) لە زانکۆی جیهان-هەولێر، لە چوارچێوەی چالاکییەکانی هەفتەی جیهانیی هۆشیاری دەربارەی بەرگریی دژەزیندەکان (Antibiotics)، وۆرکشوێپێکی زانستیی لەناو کەمپی زانکۆ بەڕێوەبرد.

 وۆرکشوێپەکە لە هۆڵی(VIP) و بە بەشداریی مامۆستایان و فێرخوازان و، بە سەرپەرشتیی پڕۆفیسۆری یاریدەدەر دکتۆرە ئامینە سەباح مەحموود جومعە، سەرۆکی بەشی بایۆلۆجیی پزیشکی بەڕێوەچوو. لە وۆرکشوێپەکەدا، دکتۆرە وەرقا فەرەج ئەحمەد (خاوەنی بەکالۆریۆس لە پزیشکی و نەشتەرگەری، بۆردی عێراقی لە نەخۆشیزانی/بەرگری و بایۆلۆجیی وردی پزیشکی لە نەخۆشخانەی ڕزگاری-هەولێر) ناوەڕۆكی بابەتەكەی پێشكەش كرد و، تیایدا تیشکی خستە سەر ئاڕاستەکانی ئێستا و ئەو هەڕەشە جیهانییەی کە لە زیادبووندایە سەبارەت بە بەرگریی دژەزیندەکان، هاوکات باسی لەو ئاڵنگارییە کلینیکییانە کرد کە ڕووبەڕووی سیستمی چاودێریی تەندروستی دەبنەوە، لەگەڵ گرنگیی بەکارهێنانی بەرپرسیارانەی دژەزیندەکان.

لای خۆیانەوە، مامۆستایانی بەشی بایۆلۆجیی پزیشکی زنجیرەیەک بابەتیان پێشکەش کرد کە باسیان لە میکانیزمەکانی بەرگریی دژەزیندەکان، شێوازەکانی خراپ بەکارهێنانیان، ستراتیژییەکانی کۆنتڕۆڵکردنی هەوکردن و، ڕۆڵی بەڕێوەبردنی دژەزیندەکان لە کەمکردنەوەی بارگرانیی هۆکارە نەخۆشییە بەرگرییەکان (Resistant Pathogens) کرد. دانیشتنەکانی وۆرکشوێپەکە تێڕوانینێکی زانستیی گشتگیریان خستەڕوو کە تێگەیشتنی بەشداربووانی بۆ ئەم هەڕەشە بێدەنگ و خێرا پەرەسەندوەی سەر تەندروستیی گشتی بەهێزتر کرد.

وۆرکشوێپەکە بە دانیشتنێکی پرسیار و وەڵامی کارلێکەر کۆتایی هات، تێیدا دەرگای گفتوگۆ بۆ فێرخوازان و مامۆستایان کرایەوە و باسیان لە ڕێگە کردارییەکانی بەرەنگاربوونەوەی بەرگریی دژەزیندەکان بکەن.