سەرۆکایەتى بەشی کارگێڕیی گشتی سەردانێکی زانستی بۆ نەخۆشخانەی پیرمام بۆ فێرخوازەکانى ڕێکخست

ڕۆژی یەکشەممە، ڕێکەوتی (١٤/١٢/٢٠٢٥)، سەرۆکایەتى بەشی کارگێڕیی گشتی لە زانکۆی جیهان-هەولێر، بە سەرپەرشتیی مامۆستای یاریدەدەر (راز ئازاد جەلال)، سەردانێکی زانستیی بۆ فێرخوازانی قۆناغی چوارەمی بەشەکە بۆ نەخۆشخانەی پیرمام ڕێکخست.

لە میانی سەردانەکەدا، فێرخوازان بە گەرمی لەلایەن (هۆزان ئەحمەد حسێن)، بەڕێوەبەری کارگێڕیی نەخۆشخانەی پیرمامەوە پێشوازییان لێکرا، پاشان پوختەیەکی دەربارەی سیستمی ڕێکخستن و چوارچێوەی کارگێڕیی نەخۆشخانەکە خستەڕوو. هەروەها ئەرک و فەرمانی بەشە سەرەکییەکانی نەخۆشخانەی ڕوون کردەوە، کە پێکهاتبوون لە: کارگێڕی، کاروباری دامەزراندن و سەرچاوە مرۆییەکان، کڕین، ئامار، پێشوازی و دەرچوون، بەشی کۆمپیوتەر و تەکنەلۆژیای زانیاری، ژمێریاری و دارایی، تۆمار و ئەرشیف، تۆماری لەدایکبوون، ژینگە و تەندروستیی گشتی، لەگەڵ بەشی خزمەتگوزاری و پاڵپشتی. ئەم سەردانە دەرفەتێکی بەنرخی بۆ فێرخوازان ڕەخساند بۆ ئەوەی لە نزیکەوە ئاگاداری چۆنیەتی پیادەکردنی بنەماکانی کارگێڕیی گشتی بن لە دامەزراوە حکومییەکاندا، ئەوەش بووە هۆى ئەوەى نەخۆشخانەی پیرمام ژینگەیەکی گونجاو بۆ فێرخوازان دەستەبەر بکات بۆ تێبینیکردنی چۆنیەتی جێبەجێکردنی بنەماکانی کارگێڕیی گشتی لە یەکە حکومییەکاندا بە شێوەیەکی کردەیی.

دواتر بە هاوکاریی هەریەک لە (د. ئەرکان فەلاح حسێن) و (د. سلاڤا سالار ئەنوەر) و بە سەرپەرشتیی بەڕێوەبەری کارگێڕی، فێرخوازان گەشتێکی مەیدانییان بەنێو ژمارەیەک لە بەشەکانی نەخۆشخانەکەدا ئەنجام دا. لە میانەی گەشتەکەدا، یەکێک لە پزیشکەکان باسی لە سروشتی کارەکەی و بەرپرسیارێتییەکانی کرد، کە بریتی بوون لە ئەنجامدانی پشکنینی ڕۆژانە بۆ نەخۆشەکان، ئامادەکردنی ڕاپۆرتی پزیشکی و نووسینی ڕاپۆرتی فەرمی بۆ پۆلیس لە حاڵەتەکانی ڕووداو و فریاکەوتندا، هەروەها بەرزکردنەوەی ئەم ڕاپۆرتانە بۆ بەرپرسی سەرپەرشتیکردنی سەرجەم نەخۆشەکان لە نەخۆشخانەی پیرمام.

لە کۆتایی سەردانەکەدا، فێرخوازان سوپاس و پێزانینی دڵسۆزانەی خۆیان ئاراستەی کارگێڕی و فەرمانبەرانی نەخۆشخانەی پیرمام کرد بۆ ئەو پێشوازییە گەرمە و هاوکاری و زانیارییە بەنرخانەی پێشکەشیان کردن، کە ڕۆڵێکی کاریگەری هەبوو لە بەهێزکردنی تێگەیشتنی کردەییان بۆ بنەماکانی کارگێڕیی گشتی لە کەرتی تەندروستیدا.