فێرخوازانى شیکاری تاقیگەی پزیشکی سەردانی سەنتەری پزیشکی نەورۆز دەکەن
ڕۆژی چوارشەممە ڕێکەوتى (١٩/٢/٢٠٢٥) فێرخوازانى قۆناغی چوارەمی بەشی شیکاری تاقیگەی پزیشکی لە زانکۆی جیهان – هەولێر، بەسەرپەرشتی مامۆستاى یاریدەدەری ئارام محمد برا، سەردانێکی زانستیان بۆ سەنتەری پزیشکی نەورۆز ئەنجامدا.
لە میانی سەردانەکەدا، فێرخوازان لەلایەن هاوار خورشید حەمەئەمین، بەڕێوەبەری سەنتەرەکەوە پێشوازییان لێکرا، بۆ ئەوەش سەرەتا ڕوونکردنەوەیەکی وردی لەبارەی گرنگی ڤاکسین لە خۆپاراستن لە نەخۆشی و ڕۆڵی لە پێشخستنی تەندروستی گشتی پێشکەش کرد. پاشان فێرخوازان هاوەڵى کران بۆ بەسەرکردنەوەى بنکەکە، لەو چوارچێوەیەشدا فێرخوازان زانیاری پێویستیان لەبارەى جۆرە جیاوازەکانی ڤاکسین وەرگرت کە بۆ پاراستن لە نەخۆشییە جیاوازەکان بەکاردەهێنرێن، لەوانە ئەنفلۆنزا، هەوکردنی جگەر و سورێژە. هەروەها باسیان لە سورێژە و شێوازەکانی پێکەوتە و پێدانی بە منداڵان لە ڕێگەی قەترەی زارەکی یان دەرزییەوە کرد، کە لە تەمەنی یەک هەفتەییەوە دەست پێدەکات و بەپێی کێشی منداڵەکە بڕەکەى گۆڕانى بەسەردا دێ، هەروەها ستافی سەنتەرەکە جەختیان لەسەر گرنگی گواستنەوە و هەڵگرتنی دروستی ڤاکسین کردەوە بۆ دڵنیابوون لە کاریگەری و سەلامەتی و کوالیتییان.
لە کۆتایی سەردانەکەدا گفتوگۆکە لەبارەى ڕێگەکانى هۆشیاری کۆمەڵگە سەبارەت بە پێویستی کوتان، بەتایبەتی لە پاراستنی منداڵان لە نەخۆشییە سەختەکان کرا، بۆ ئەوەش فێرخوازان چالاکانە بە پرسیارکردن بەشدارییان لە گفتوگۆکان کرد و، لەلایەن پسپۆڕانی سەنتەرەکەوە بە وردی وەڵامدرانەوە.
لە کۆتاییدا، فێرخوازان سوپاسى ستافی سەنتەری پزیشکی نەورۆزیان کرد بۆ ڕەخساندنى ئەو کاتە و پێدانى ڕوونکردنەوەیەکی ورد لەبارەى پێکوتەکان، کە تێگەیشتنیان لە گرنگی ڤاکسینەکان و ڕۆڵی ئەوان لە تەندروستی گشتی زۆر دەوڵەمەندتر کرد.
