فێرخوازانى کۆلێژی دەرمانسازی سەردانی پیشانگەی تەندروستی نێودەوڵەتی مێدیکۆی دەکەن

ڕۆژی پێنچ شەممە ڕێکەوتى (6/2/2025) بە سەرپەرشتی دکتۆر محمد ئایدن ڕاگری کۆلێژی دەرمانسازی لە زانکۆى جیهان-هەولێر، بە ئامادەبوونى ژمارەیەک لە مامۆستایانى بەشەکە،  گروپێک لە فێرخوازانى  کۆلێژی دەرمانسازی سەردانی پیشانگەی تەندروستی نێودەوڵەتی مێدیکۆیان  لە شاری هەولێر کرد.

لە میانەی سەردانەکەدا شاندەکەى کۆلێژى دەرمانسازى سەردانی دامەزراوەی حکومیەکان و بەتایبەت دەستەی کۆنترۆڵی جۆری دەرمانی کوردستان(KMCA)یان کرد، هاوکات ڕاگر و مامۆستایانى ئامادەبوو ژمارەیەکى دیکەى دامەزراوە حکومیەکانى تایبەت بە بوارى دەرمان و کۆمپانیا تایبەتەکانیان بە فێرخوازان ناساند، لەهەمان کاتدا پسپۆڕانی کوالیتی کۆنترۆڵ زانیاری گرنگیان لەبارەى دامەزراوەکەیان و  ڕێکارەکانی حکومەتی هەرێمی کوردستان بۆ بەرزکردنەوەی کوالێتی دەرمان لە دەرمانخانەکانی کوردستان پێشکەش بە فێرخوازانى کۆلێژى دەرمانسازى کرد.

لە وێستگەیەکى دیکەى سەردانەکەیاندا، فێرخوازانى زانکۆى جیهان-هەولێر سەردانی کۆمپانیای  (گرووپی کەوکەب)یان کرا، کە تێیدا باسیان لە شێوازەکانی هەڵگرتن و گواستنەوەی دەرمان لە نێوان کۆگاکانی کۆمپانیاکە و دواتر بۆ دەرمانخانەکان کرد، ئەمە جگە لە چەندین گفتوگۆی بەسوود کە لە نێوان فێرخوازان  و نوێنەرى کۆمپانیا بەشداربووی پیشانگاکەدا لەبارەى دەرمان ئەنجامدران.