فێرخوازانی ئەندازیاری شارستانی سەردانى بەڕێوبەرایەتی خزمەتگوزاری و پاراستنی ژینگەى هەولێر دەکەن

ڕۆژی چوارشەممە ڕێکەوتى (12/2/2025)، سەرۆکایەتى بەشی ئەندازیاری شارستانی لە زانکۆی جیهان-هەولێر بەسەرپەرشتى دکتۆر  ئیسماعیل خەلیفە سەردانێکی زانستی بۆ فێرخوازانی قۆناغی چوارەم لە بەشی ئەندازیاری شارستانی بۆ بەڕێوەبەرایەتی خزمەتگوزاری و پاراستنی ژینگە لە شارەوانی هەولێر بەڕێوەبرد.

لە میانەى سەردانەکەیاندا، فێرخوازانى ئەندازیارى شارستانى دیدارێکیان لەگەڵ ئەندازیار ژیار جەلال حسێن، بەڕێوەبەری خزمەتگوزاری و پاراستنی ژینگە و، شارەزا لە هەردوو بواری ئەندازیاری ژینگەیی و شارستانی ئەنجامدا، لە میانەى دیدارەکەدا ڕوونکردنەوەی وردی لە بارەی دۆخی ئێستای سیستمی بەڕێوەبردنی پاشماوەکانى شارەوانی لە هەولێر پێشکەش بە فێرخوازان کرد، لەگەڵ ئاماژەکردن بەو ئاڵنگاریانەى کە ڕووبەڕوویان دەبێتەوە بەتایبەت لە قۆناغی کۆکردنەوەى پاشماوەکان تا وێستگەکانی فڕێدانی کۆتایی.  هەر لە میانەى دیدارەکەدا باسیان لە کاریگەرییە ژینگەیی، کۆمەڵایەتی و ئابوورییەکانی پاشماوەی شارەوانییەکان لەسەر بەردەوامیی شارەکان کرد، وتیشى دەستنیشانکردنی کێشە سەرەکییەکانی بەردەم سیستمی بەڕێوەبردنی پاشماوە لە هەولێر، بریتین لە لە کۆکردنەوەی پاشماوەی ناکارامەوە تا شوێنەکانی زبڵدان.

لە کۆتایی دیدارەکەش ئاماژە بە تەکنیکە سەرکەوتووەکانی بەڕێوەبردنی پاشماوەکان لە وڵاتانی پێشکەوتووەکان کرا، بەتایبەتی لە ژاپۆن، وتیشى گفتوگۆکردن لەسەر ستراتیژییە جیاوازەکان بۆ بەرزکردنەوەی کارایی کۆکردنەوە و چارەسەرکردن و فڕێدانی پاشماوە لەناو هەولێر لەگەڵ لایەنە پەیوەندیدارەکان بەردەوامین.