فێرخوازانی بەشی زمانی ئینگلیزی چاودێریی گەشەی زمانیی منداڵانی باخچەی ساوایان دەکەن
ڕۆژی یەکشەممە، ڕێکەوتی (٢٣/١١/٢٠٢٥)، فێرخوازانی قۆناغی دووەمی بەشی زمانی ئینگلیزی لە زانکۆی جیهان-هەولێر، بە سەرپەرشتیی مامۆستای یاریدەدەر (مەروا مەحمود ئەمین)، سەردانی باخچەی ساوایانی جیهانیان کرد.
لەکاتی گەیشتنی شاندەکەدا، لەلایەن (مەحمود عیماد محەمەد)، بەڕێوەبەری باخچەکە، پێشوازییەکی گەرمى لە مامۆستای سەرپەرشتیار و فێرخوازان کرد، پاشان فێرخوازان لە یەکێک لە پۆلەکان دەستیان بە چالاکیەکەیان کرد، کە لەلایەن مامۆستا (سارە ئەحمەد)، مامۆستای سەرەکی و بە هاوکاریی مامۆستایان (سۆما و دیلان) بەڕێوە دەچوو. لەوێدا دەرفەت بۆ فێرخوازان ڕەخسا کە چاودێریی توانا پەیوەندییەکان و گەشەی زمانیی منداڵان بە گشتی بکەن.
لە میانی پرۆسەی تێبینیکردندا، فێرخوازان کۆمەڵێک نیشانەری گرنگیان تۆمار کرد، لەوانە: توانای منداڵان لە جێبەجێکردنی ڕێنماییەکان، پێکهێنانی ڕستەی سادە، دەربڕینی دەنگەکان بە دروستی، دەربڕینی پێداویستییەکانیان، نۆرەگرتن لەکاتی قسەکردندا، پاراستنی سەرنج و بەکارهێنانی وشەسازیی گونجاو، جگە لە تێبینیکردنی هەر دواکەوتن یان گرفتێکی ئەگەری لە قسەکردندا. ئەم تێبینییانە یارمەتیدەر بوون بۆ تێگەیشتن لەوەی چۆن منداڵان وەڵامی دۆخە فێرکارییە جیاوازەکان دەدەنەوە و چۆن چالاکییە ڕێکخراوەکان دەتوانن بە کارایی پشتگیریی گەشەی زمانییان بکەن.
