فێرخوازانی بەشی وەرگێڕان وەک وەرگێڕی پیشەیی لە پیشانگەی نێودەوڵەتیی هەولێر بەشداریان كرد

دوو فێرخوازی قۆناغی چوارەمی بەشی وەرگێڕان لە زانکۆی جیهان – هەولێر، بە ناوەکانی (ئاڤێستا عەباس ئەبوبەکر) و (نوور پشتیوان ئەسعەد)، وەك وەرگێڕ بەشدارییان لە پیشانگەی نێودەوڵەتیی هەولێر بۆ خۆراک و پاکێجینگ (Agro Pack, Food & Plast Iraq 20) كرد.

لەو پیشانگەیەدا، کە لە ڕێكەوتی (24-27/11/2025) بەردەوام بوو، زیاتر لە (400) کۆمپانیاى ناوخۆیی و نێودەوڵەتى بەشدارییان تیادا کردوە و، نوێترین تەکنەلۆژیا و داهێنان و بەرهەمەکانیان نمایش کردوە، لەو چوارچێوەیەشدا فێرخوازانی زانكۆی جیهان-هەولێر وەک وەرگێڕی پیشەیی لەناو ژووری ژمارەیەک لە کۆمپانیا بەشداربووەکاندا، بە شێوەیەکی کرداری ئەرکی وەرگێڕان لە نێوان نوێنەرانی کۆمپانیا بیانییەکان و سەردانیکەران و بازرگانان ئەنجام دا بۆ ئاسانکاری بۆ پرۆسەی گفتوگۆ و ناساندنی بەرهەمەکان، هەروەها پشتیوانی لە کارلێکی تەکنیکی و بازرگانیی نێوان لایەنەکان دەکات.

ئەم ڕۆڵە دەرفەتێکی کرداریی گرنگی بۆ فێرخوازانی بەشی وەرگێڕان ڕەخساند تاوەکو ئەو لێهاتووییانەی لە ساڵانی خوێندندا فێری بوون، لە ژینگەیەکی واقیعیدا جێبەجێ بکەن کە پێویستی بە وردبینی، خێرایی تێگەیشتن و توانای پەیوەندیکردنی کارا هەیە. جگە لە ڕۆڵە زمانەوانییەکەیان، فێرخوازان ئاشنای نوێترین تەکنەلۆژیاکانی بواری پیشەسازیی خۆراک و داهێنانەکانی پاکێجینگ بوون، کە ئەمەش ئاسۆی تێگەیشتنیان بۆ زاراوە تایبەتمەندەکانی ئەو کەرتە فراوانتر دەکات و ئەزموونی پیشەییان لە وەرگێڕانی تایبەتمەنددا دەوڵەمەند كرد.