فێرخوازانی کۆلێژی دەرمانسازی لە زانکۆی جیهان – هەولێر بە سەردانێكی زانستی نەخۆشخانەی شاریان بەسەركردەوە

ڕۆژی چوارشەممە ڕێكەوتی (26/11/2025) فێرخوازانی قۆناغی چوارەمی کۆلێژی دەرمانسازی لە زانکۆی جیهان – هەولێر، بە سەرپەرشتی دکتۆر محەممەد ڕەشید، سەردانێکی مەیدانیی فێرکارییان بۆ نەخۆشخانەی تایبەتی شار ئەنجامدا.

لە کاتی گەیشتنیان، فێرخوازان لەلایەن دکتۆر کاروان خوسرەو ئەحمەد، پزیشکی نیشتەجێی دێرین لە نەخۆشخانەکە، پێشوازییەکی گەرمیان لێکرا. لە میانی سەردانەکەدا، فێرخوازان دابەشی سەر چەند گرووپێک کران بە مەبەستی ئاشنابوون بە لایەنە جیاوازەکانی دەرمانسازیی کلینیکی (سەریری) لە نەخۆشخانەکەدا، لەوانە چۆنیەتیی نووسینی دەرمان، دابەشکردن و بەدواداچوونی لە چوارچێوەی ژینگەی پزیشکیدا. ئەمەش دەرفەتی بۆ فێرخوازان ڕەخساند بە شێوەیەکی کرداری لە بواری چاودێریی نەخۆشدا كارەكان جێبەجێی بکەن.

لەم گەشتە زانستییەدا، فێرخوازان زانیاریی گرنگیان دەربارەی میکانیزمەکانی کارکردن لە دەرمانسازی نەخۆشخانە بەدەست هێنا، وەک خزمەتگوزاریی نەخۆشە خەوێنراوەکان و ڕاوێژکارییەکان، ئامادەکردنی پاکژی دەرمان (Sterile Preparation) و پێکەوەگونجاندنی دەرمان (Medication Reconciliation).  هاوکات تێگەیشتنیانی بۆ ڕۆڵی دەرمانساز لە ژینگە پزیشکییەکان و نەخۆشخانەکاندا بەهێزتر کرد.