بەشی تەکنیکەکانی سڕکردن سەردانێکی زانستی و مەیدانی بۆ فێرخوازان بۆ تاقیگەی (Bio Plus) ئەنجام دا

ڕۆژی پێنچ شەممە ڕێکەوتی ٢٧/١١/٢٠٢٥، بەشی تەکنیکەکانی سڕکردن لە زانکۆی جیهان-هەولێر، بە سەرپەرشتیی دکتۆرە سارا لەیس عەبدولجەلیل، پسپۆڕی نەخۆشییەکانی خوێن، سەردانێکی زانستیی ئەکادیمی و پڕاکتیکییان بۆ تاقیگەی (Bio Plus) ئەنجامدا.

لەم سەردانەدا کۆمەڵێک لە فێرخوازانی قۆناغی سێیەم بەشدارییان كرد، دوای پێشوازیكردن لە فێرخوازان، ئینجا سەردانی ژوورەکانی وەرگرتنی سامپڵی خوێنیان کرد، لەوێ ڕوونکردنەوەیان پێشکەش کرا دەربارەی ڕێکارەکانی وەرگرتنی نموونە بە شێوەیەکی پیشەیی و بنەماکانی مامەڵەی سەلامەت لەگەڵ نەخۆش. پاشان فێرخوازان لە تاقیگە سەرەکییەکان و ئاشنای ئامێری شیکاریی ژماردنی تەواوی خوێن (CBC) و چاودێریکردنی ئامادەکردن و پشکنینی سلایدەکانی خوێن لەژێر مایکرۆسکۆپدا كران، کە ئەمەش تێگەیشتنێکی قووڵتری پێ بەخشین دەربارەی شێوە و فەرمانی خانەکانی خوێن.

پاشان بەشێوەیەكی کرداریی ئاشنای ئامێری جیاکردنەوەی پێکهاتەکان (Centrifuge) و ئامێری (Smart Rate – ESR Auto) بۆ پێوانی ڕێژەی نیشتنی خڕۆکە سوورەکانی خوێن كران، بۆ ئەوەش تیمەکە ڕوونکردنەوەیەکی وردیان پێشکەش  بە فێرخوازان کرد دەربارەی ئامێرەکانی شیکاریی (Teco) و (Stago) کە بۆ پشکنینەکانی مەیینی خوێن وەک (PT, PTT, Lupus, Fibrinogen) بەکاردێن، بە تیشک خستنە سەر ڕۆڵی سەرەکییان لە هەڵسەنگاندنی سیستەمی مەیینی خوێن.

لە درێژەی سەردانەکەدا،  فێرخوازان ئاشنای ئامێرەکانی شیکاریی ئەلیکترۆلایتەکان بوون، بەتایبەت ئامێری (Electrolytes Analyzer) بۆ پێوانی سۆدیۆم، پۆتاسیۆم و کلۆراید. هاوکات ئاشنای پلاتفۆرمە پێشکەوتووەکانی شیکاری وەک (Cobas 6000) و (Cobas Integra) بۆ شیکاریی بایۆکیمیایی بوون، سەرەڕای سیستمەکانی (Cobas E411) و (Abbott) بۆ پشکنینی هۆرمۆنەکان. هەروەها بینەری سیستمی (Celis) بۆ شیکاریی میز بوون و ئاشنای ڕێکارەکانی کارکردن لە تاقیگەی ڤایرۆسەکان بوون.