فێرخوازانى بەشى وەرگێڕان زنجیرەیەک چالاکیی زانستییان لە ئامادەیی شەمی کچان بەڕێوەبرد
ڕۆژی (٣ی شوباتی ٢٠٢٦)، کۆمەڵێک لە فێرخوازانی قۆناغی سێیەمی بەشی وەرگێڕان لە زانکۆی جیهان-هەولێر، بە هاوکاری مامۆستای بابەتی وەرگێڕانی یەک لەدوای یەک (دکتۆر جیهان نەفەعەدین عەبدولسەمەد)، سەردانێکی زانستییان بۆ ئامادەیی شەمی کچان لە هەولێر ئەنجامدا.
شاندی زانکۆ لەلایەن خاتوو (نەهلا عەبدولغەنی شەهاب) بەڕێوەبەری قوتابخانە، پێشوازییان لێکرا. سەرەتای چالاکییەکە بە وتارێکی ناساندن لەلایەن مامۆستای بابەتەوە دەستیپێکرد، کە تێیدا تیشکی خستە سەر گرنگیی وەرگێڕان و بەکارهێنانەکانی. وەک بەشێک لە وانەکە، مامۆستاکە مەشقێکی وەرگێڕانی ڕاستەوخۆی لە ئینگلیزییەوە بۆ کوردی ئەنجامدا، کە بووە نموونەیەکی پراکتیکی بۆ قوتابیان. پاشان فێرخواز (محەمەد یونس محەمەد) تێڕوانینێکی گشتی لەسەر بەشی وەرگێڕان لە زانکۆی جیهان-هەولێر و ژینگەی ئەکادیمی بەشەکە پێشکەش کرد.
دواتر، فێرخواز (مەروان ئەنوەر عەبدوڵڵا شەریف) چالاکییەکی کارلێککارانەی پرسیار و وەڵامی ئەنجامدا، کە تێیدا لەبارەی ئارەزووەکان، خاڵە بەهێزەکان و ئەو زمانانەی قوتابیان دەیزانن گفتوگۆی لەگەڵ کردن. لە بەشێکی تری چالاکییەکەدا، فێرخواز (فاتیمە عادل عەتاڵا حەلیل) چەند وشەیەکی پێشکەش کرد بۆ هەڵسەنگاندنی ئاستی وشەسازیی قوتابیان بە زمانەکانی ئینگلیزی، کوردی و عەرەبی.
لە کۆتاییدا فێرخواز (ئەلحەسەن هانی عەبدوڵڵا نەجیم) وتارێکی وردی لەسەر بەشە جیاوازەکانی زانکۆی جیهان-هەولێر و چۆنیەتی هەڵبژاردنی پڕۆگرامی ئەکادیمیی گونجاو پێشکەش کرد و، ئامۆژگاری قوتابیانی کرد لەبارەی جیاوازی نێوان هەڵبژاردن بەپێی ئارەزوو یان بەپێی نمرە.
