فێرخوازانی بەشی پەروەردەی گشتی سەردانی کتێبخانەی هەڤاڵ لە هەولێر دەکەن

ڕۆژى پێنچ شەممە ڕێکەوتى (٢٣/١٠/٢٠٢٥) گرووپێک لە فێرخوازانی قۆناغی دووەمی بەشی پەروەردەی گشتی (ELT) لە زانکۆى جیهان-هەولێر، گەشتێکی ئەکادیمیان بۆ کتێبخانەی هەڤاڵ لە شاری هەولێر ئەنجامدا.

سەردانەکە لەلایەن مامۆستای یاریدەدەر شیرین لەتیف، سەرپەرشتی کرا، کە بە درێژایی گەشتەکە یاوەری فێرخوازانی کرد و ڕۆڵی سەرەکی بینی لە ناساندنی کۆمەڵێک کتێبی پەروەردەیی و ئەدەبی بەپێز، کە بە تایبەتی بۆ پەرەپێدانی تێگەیشتن و زانیاری فێرخوازان لە بواری فێرکردنی زمانی ئینگلیزی داڕێژرابوون.

لەم سەردانەدا، سەرەتا فێرخوازان بە گەرمی لەلایەن شەفیع محەمەد حەسەن، نوێنەری کتێبخانەکە، پێشوازییان لێکرا. پاشان هاوەڵى گرووپەکەی فێرخوازانى کرد بۆ ناو بەشە جیاوازەکانی کتێبخانەکە، کە هەریەکەیان گەنجینەیەکی پڕ لە زانیاری و سەرچاوەی دەوڵەمەندی لەخۆگرتبوو. فێرخوازان بە ووردی چاودێری ژینگەی کتێبخانەکەیان کرد، کە بە شێوەیەکی پرۆفیشناڵ و ئارامبەخش ڕێکخرابوو، بۆ خوێندن و توێژینەوە زۆر گونجاو بوو. ئەوان بە پەرۆشەوە سەیری کۆمەڵێک کتێبی هەمەچەشنیان کرد، لە بوارەکانی پەروەردە، زمانەوانی، ئەدەبیات و میتۆدەکانی فێرکردن، کە هەریەکەیان ڕۆڵێکی گرنگ لە پەرەپێدانی زانیارییەکانیان هەیە. لەو چوارچێوەیەشدا گفتوگۆیەکی کراوە و سوودبەخش لە نێوان فێرخوازان و نوێنەری کتێبخانەکەدا کرا، سەبارەت بەوەی چۆن ئەم سەرچاوانە دەتوانن وەک پاڵپشتییەکی بەهێز خزمەت بکەن بۆ خوێندنی ئەکادیمی و گەشەی پیشەییان لە بواری تایبەتی ELT .

لە کۆتایی سەردانەکەدا، فێرخوازان سوپاسی شەفیع محەمەد حەسەنیان کرد بۆ ڕەخساندنى ئەو دەرفەتە و، وەڵامدانەوەى پرسیارەکانیان.