فێرخوازانی بەشی یاسا بە سەردانێك زانستیی بەڕێوەبەرایەتیی بەڵگەکانی تاوان لە هەرێمی کوردستان بەسەردەكەنەوە

ڕۆژی پێنچ شەممە ڕێكەوتی (27/11/2025) فێرخوازانی بەشی یاسا لە زانکۆی جیهان-هەولێر، بە سەرپەرشتی (دكتۆر عەلی سەلیم نووری) مامۆستای یاسای سزایی، سەردانی بەڕێوەبەرایەتیی بەڵگەکانی تاوانیان لە هەرێمی کوردستان کرد.

شاندەکە لەلایەن ڕائید (تاهیر ڕەحمان)، ئەفسەر و شارەزا لە کۆکردنەوەی بەڵگە لە شوێنی تاوان، پێشوازییەکی گەرمیان لێکرا.لەم سەردانەدا، وانەیەکی پراکتیکی دەربارەی بنەماکانی لێکۆڵینەوەی تاوانکاری لە شوێنی تاوان (بە شێوەی گریمانەیی) پێشکەش بە فێرخوازان کرا، تێیدا شێوازی کارکردنی تیمەکانی بەڵگەی تاوان لە کاتی کۆکردنەوەی بەڵگە و ڕەچاوکردنی لایەنە یاساییەکان لە تاوانێکی کوشتنی گریمانەییدا بۆ مەبەستی فێرکاری نمایش کرا. هەروەها ڕائید تاهیر ڕەحمان ڕوونکردنەوەی تێروتەسەلی دەربارەی چەندین بابەتی پەیوەندیدار بە بەڕێوەبەرایەتییەکە بەگشتی و شوێنی تاوان بەتایبەتی خستەڕوو. هاوكات باسی لە ڕۆڵی بەڕێوەبەرایەتیی بەڵگەکانی تاوان کرد لە پاراستنی بەڵگەکان و پاڵپشتیکردنی دەزگا دادوەرییەکان بە بەڵگەی پێویست، کە دەبێتە هۆی دەرچوونی بڕیاری دادپەروەرانە. هەروەها تیشکی خستە سەر ڕۆڵی لێکۆڵەر و گرنگییەکەی لە کۆکردنەوە و پاراستنی بەڵگەکان، لەگەڵ ئەو سیفەتانەی کە پێویستە لێکۆڵەر هەیبێت بۆ ئەوەی ئەرکەکەی بە کارایی ئەنجام بدات.

لە کۆتاییدا، دکتۆر عەلی بە ناوی سەرۆكایەتی بەشی یاسا، سوپاس و پێزانینی ئاراستەی بەڕێوەبەرایەتیی بەڵگەکانی تاوان کرد بۆ تەرخانکردنی کات و هەوڵ و پێشوازییە گەرمەکەیان لە فێرخوازان.