فێرخوازانی کۆلێژی دەرمانسازی لە زانكۆی جیهان-هەولێر سەردانی تاقیگەی توێکاری لە زانکۆی هەولێری پزیشکی دەكەن

ڕۆژی پێنچ شەممە ڕێكەوتی (27/11/2025)، فێرخوازانی قۆناغی دووەمی کۆلێژی دەرمانسازی لە زانکۆی جیهان-هەولێر، بەشدارییان کرد لە سەردانێکی زانستی و فێرکاری بۆ تاقیگەی توێکاری (Anatomy) لە زانکۆی هەولێری پزیشکی.

سەردانەکە بە سەرپەرشتی دکتۆر فارس محەمەد بەڕێوەچوو، لە وتەیەكیدا ڕونكردنەوەیەكی وردی دەربارەی گرنگترین ناوچە و پێکهاتە سەرەکییەکانی جەستەی مرۆڤ پێشکەش  بە فێرخوازان کرد، هەروەها دیمەنە توێکارییەکانی بە شێوەیەکی ڕاستەوخۆ لەسەر نموونەی ڕاستەقینەی تەرمی مرۆڤ خستەڕوو، ئەمەش دەرفەتی بۆ فێرخوازان ڕەخساند تاوەکو بە شێوەیەکی کرداری و گشتگیر تێبینی ئەندام و کۆئەندامەکان و پەیوەندییە توێکارییەکان ببینن، هاوكات فێرخوازان لە ڕێگەی پرسیاری ورد و قوڵەوە دەربارەی زانستی توێکاری بەشدارییان  لە گفتوگۆكان کرد و، پرسیاریان دەربارەی جیاوازییەکانی حەوز (Pelvis) لەنێوان نێر و مێ، گرنگی وەزیفی بەشەکان (لۆبەکان)ی جگەر و چۆنیەتی هەماهەنگی کۆئەندامی دەمار لەگەڵ ئەندامەکانی دیکە بۆ پاراستنی فەرمانەکانی لەش کرد.

 هەروەها بەشێک لە فێرخوازان گرنگییەکی تایبەتیان بە ڕۆڵی زمانەکانی دڵ (Valves) لە ڕێکخستنی ڕۆیشتنی خوێندا دا، لەکاتێکدا هەندێکی دیکە پرسیاریان دەربارەی ئەو جیاوازییە توێکارییانە کرد کە لەوانەیە لە کۆئەندامی هەرسدا دەربکەون. ئەم گفتوگۆیانە تەنها لە ڕوونکردنەوەی چەمکە ئاڵۆزەکاندا کورت نەبووەوە، بەڵکو هاندەر بوو بۆ بیرکردنەوەی ڕەخنەگرانە، ئەمەش وایکرد سەردانەکە ببێتە ئەزموونێکی پڕ لە چالاکی و هاندەر بۆ لایەنی هزری و زانستی.