كۆلێژی پزیشكی ددان

دیدگه‌ و تێڕوانینی ئه‌م كۆلێژه‌ بۆ داهاتوو بریتیه‌ له‌ پاڵپشتكردنی سیسته‌می ته‌ندروستی له‌ ڕێی ده‌ستنیشانكردن و چاره‌سه‌ركردنی كێشه‌ و نه‌خۆشیه‌كانی ده‌م و ددان به‌ شێوه‌یه‌كی ئاست به‌رز، هه‌روه‌ك هه‌وڵی ته‌واو ده‌دات بۆ به‌دیهێنانی دڵنیایی ئه‌كادیمی له‌سه‌ر زانیاری زانستی نوێ و نوێبوونه‌وه‌، هه‌روه‌ها په‌یوه‌ندی له‌گه‌ل توێژینه‌وه‌ی زانستی به‌هێز ده‌كات، بۆیه‌ قوتابیانی ئه‌م كۆلێژه‌ هانده‌درێت تا به‌شێوه‌یه‌كی پڕۆفیشناڵ و ئاست به‌رز ڕۆڵی گرنگ ببینن له‌ به‌ڕێوه‌بردنی خزمه‌تگوزاریه‌كانی پزیشكی ده‌م و ددان له‌ پێناو باشتركردنی خزمه‌تكردنی كۆمه‌ڵگه‌ و دانیشتوان له‌ هه‌رێمی كوردستان و عێراق.

ئامانجی كۆلێژی پزیشكی ددان بریتیه‌ له‌ ڕه‌خساندنی هه‌ل بۆ قوتابیان و فێرخوازان تا په‌ره‌ به‌ توانا زانستی و ئه‌كادیمیه‌كانی خۆیان بده‌ن، هه‌روه‌ها بۆ ئه‌وه‌ی له‌ دوای ده‌رچوونیان و ته‌واوكردنی خوێندنه‌كه‌یان به‌ سه‌ركه‌وتوویی ببنه‌ پزیشكێكی لێهاتوو و گۆشكراو به‌ زانست و زانیاری سه‌رده‌م له‌ بواری پزیشكی ده‌م و ددان به‌م هۆیه‌شه‌وه‌ بتوانن ڕۆڵی كارا له‌ پێشخستنی كه‌رتی ته‌ندروستی و خزمه‌تكردنی كۆمه‌ڵگه‌دا بگێڕن.

پاش ته‌واوكردنی خوێندنی (5) پێنج ساڵ به‌ سه‌ركه‌وتوویی و به‌ ده‌ستهێنانی بڕوانامه‌ی به‌ كالۆریۆس له‌ پریشكی و نه‌شته‌رگه‌ری ده‌م و ددان، ده‌رچووان ده‌توانن كاربكه‌ن له‌:

كاركردن وه‌ك پزیشكی ددان له‌ نۆرینگه‌ و بنكه‌ و سه‌نته‌ر و نه‌خۆشخانه‌كان ( گشتی و تایبه‌ت).
كاركردن وه‌ك پزیشك و ئه‌ندام له‌ ڕێكخراوه‌ ته‌ندروستیه‌كان ( نێوه‌خۆیی و نێوده‌وڵه‌تی).
كاركردن وه‌ك توێژه‌ر له‌ سه‌نته‌ره‌كانی توێژینه‌وه‌ و نێوه‌نده‌ ئه‌كادیمیه‌كان.

كۆلێژی پزیشكی ددان له‌ زانكۆی جیهان – هه‌ولێر له‌ ساڵی 2022 ده‌رگای به‌ ڕووی قوتابیان كردۆته‌وه‌، له‌م كۆلێژه‌دا ده‌رچووانی ئاماده‌ی زانستی وه‌رده‌گیرێت، ماوه‌ی خوێندن له‌م كۆلێژه‌ (5) پێنج ساڵه‌، خوێندن به‌ زمانی ئینگلیزیه‌.

له‌م كۆلێژه سیسته‌می بۆڵۆنا پڕۆسس جێبه‌جێ ده‌كرێت، كه‌ تیایدا وانه‌كان له‌لایه‌ن مامۆستا و ستافی نێوه‌خۆیی و نێوده‌وڵه‌تی سه‌رپه‌رشتی ده‌كرێن.

په‌یامی سه‌ره‌كی كۆلێژه‌كه‌مان بریتیه‌ له‌ به‌خشینی بڕوانامه‌ی به‌كالۆریۆس له‌ پزیشكی و نه‌شته‌رگه‌ری ده‌م و ددان، هه‌ربۆیه‌ ڕێنماییه‌كانمان له‌ چوارچێوه‌ی ئه‌م پڕۆگرامه‌ ئه‌كادیمیه‌دا بۆ پێدانی زانیاری له‌م زانسته‌دا نوێكردۆته‌وه‌ و ڕێكخستووه‌، هه‌روه‌ك له‌ ناوه‌ڕۆكی پڕۆگرامه‌كانی خوێندن و توێژینه‌وه‌ زانستیه‌كان په‌یوه‌ندیه‌كی به‌هێزمان دروستكردووه‌ به‌ ئامانجی به‌ دیهێنانی فێربوونی ئامانجدار، بۆ ئه‌م مه‌به‌سته‌ش هه‌ڵسه‌نگاندنی به‌رده‌وام بۆ پڕۆگرامه‌كانی خوێندن و ئه‌نجامی توێژینه‌وه‌ زانستیه‌ نوێیه‌كان ده‌كه‌ین، به‌م‌ شێوه‌یه‌ ده‌مانه‌وێ په‌یامی كۆلێژه‌كه‌مان بۆ خزمه‌تكردنی كۆمه‌ڵگا له‌ ڕێگه‌ی پێگه‌یاندنی فێرخوازی به‌‌ توانا و لێهاتوو به‌دیبهێنین تا داهاتوویه‌كی ته‌ندروست بۆ تاكه‌كانی كۆمه‌ڵگه بوونیاد بنێین‌.