لە زانکۆى جیهان-هەولێر هەڵمەتێک بۆ بەرنگاربونەوەى قەڵەوى بەڕێوەچوو

بەئامانجى هۆشیارکردنەوەى تاکەکانى کۆمەڵگە لە نەخۆشیەکانى قەڵەوى و، چۆنیەتى ڕوبەڕوبونەوەى، لە زانکۆى جیهان-هەولێر هەڵمەتێک بۆ بەرنگاربونەوەى قەڵەوى بەڕێوەچوو.

هەڵمەتەکە بەچاودێرى دکتۆر سامان بەرزنجى وەزیرى تەندروستى حکومەتى هەرێمى کوردستان، بەهەماهەنگى بەشى نیوتریشن و دایەتێتیکس لە زانکۆى جیهان-هەولێر و، ڕێكخراوی ئەربیل ئەڵاینس و ماڵی وەرزش و خۆراك لەگەڵ د.هەژێن بەڕێوەچوو، هەڵمەتەکە تایبەت بوو بەو کەسانەى کە باڵا و کێشیان (BMI) سەرو (٣٠) پلەیە.

لە چوارچێوەى هەڵمەتەکەدا (200) کەس لە زانکۆى جیهان-هەولێر و، دەزگا و دامەزراوە حکومیەکانى جیاوازەکانى وەک (بەڕێوبەرایەتی پۆلیسی هەولێر، بەڕێوبەرایەتی گەشت و گوزاری هەولێر، بەڕێوبەرایەتی پەروەردەی مەخمور، پارێزگای هەولێر، قەزای قوشتەپە) بەشداریان تێدا کرد، لەماوەى هەڵمەتەکەدا کە (٤٥) ڕۆژى دەخاینێت چەندین چالاکى جۆراوجۆرى پەیوەست بە نەخۆشیەکانى قەڵەوى و ڕێوشوێنە خۆپارێزییەکان و چارەسەرکردنى قەڵەوى لەلایەن کەسانى پسپۆڕ و شارەزاى بوارە لەخۆدەگرێ، بەتایبەت دانانى سیستمێكی خۆراكی و وەرزشی تەندروست بە یارمەتی پسپۆڕی خۆراك.

لەو بارەیەوە  سەرۆکى بەشى نیوتریشن و دایەتێتیکس لە زانکۆى جیهان-هەولێر لە وتەیەکیدا دواى ئەوەى سوپاسى هاوکارانى ڕێکخستنى هەڵمەتەکەى کرد، بە گرنگیەوە باسى لە چۆنیەتى ڕوبەڕوبونەوەى قەڵەوى کرد و وتى: لە ئێستادا قەڵەوی بۆتە یەکێک لە نەخۆشیە دیارەکان و هۆکارى مردنى تاکەکان، هەروەک باسى لە هۆکارەکانى زیادبونى کێش و قەڵەوى کرد بەتایبەت خراپى خواردن و تێکچونى سیستمى خەو…هتد، لە کۆتایی وتەکەشیدا ئامادەى بەشەکەیان و زانکۆى جیهانى بۆ بەردەوامیدان بەو جۆرە هەڵمەتانە کردەوە لە پێناو خزمەتکردن بەتاکەکانى کۆمەڵگە و بڵاوکردنەوەى هۆشیارى تەندروستى.

لە کۆتایی مەراسیمەکەشدا تیروپشکێک بۆ بەشداربوانى هەڵمەتەکە بەڕێوەچوو، لە پێناو بەردەوامیدان بەکارەکانیان بۆ کەمکردنەوەى کێش و ڕێکخستنەوەى سیستمى خۆراک و خەویان.

بەپێى ئامارێکى ڕێکخراوى تەندروستى جیهانى؛ ساڵانە (١,٢٠٠,٠٠٠) یەک ملیۆن و دوو سەد هەزار کەس ساڵانە بەهۆى قەڵەویەوە گیان لەدەست دەدەن، هەروەک ئاماژەى بەوەشدا داوە لە ساڵانى داهاتودا قەڵەوی دەبێتە یەکێک لە هۆکارە سەرەکیەکانى مردن لە جیهان، هەروەک بەپێى داتاکانى ڕێكخراوی ئەربیل ئەڵاینس ڕێژەى قەڵەوى لە هەرێمى کوردستان گەیشتۆتە (٦ %) هۆکارەکەشى دەگەڕێننەوە بۆ کەم خەوى و زۆر خۆرادن و وەرزش نەکردن و…هتد،