فێرخوازانی بەشی کارگێڕی گشتی گەشتێکی زانستی بۆ کۆمپانیای فلای هەولێر ئەنجام دەدەن

ڕۆژی پێنجشەممە، ڕێكەوتی (27/11/2025) فێرخوازانی قۆناغی چوارەم و دووەمی بەشی کارگێڕی گشتی لە زانکۆی جیهان – هەولێر، بە سەرپەرشتی مامۆستای یاریدەدەر ڕاز ئازاد جەلال، سەردانێکی زانستییان بۆ کۆمپانیای فلای هەولێر ئەنجامدا.

لەگەڵ گەیشتنیان، لەلایەن محەممەد زێباری، بەڕێوەبەری پەیوەندییە گشتییەکان و هۆزار هاوبەش، سەرپەرشتیاری شوێنگرتن لە فلای هەولێر، بە گەرمی پێشوازی لە فێرخوازان کرا. پاشان محەممەد زێباری سمینارێکی کورتی پێشکەش کرد کە تێیدا مێژوو، گەشەسەندن و پەیكەری کۆمپانیای فلای هەولێری ڕوون کردەوە، هەروەك ئاماژەی بەوە کرد کە پێکهاتەی ناوخۆیی کۆمپانیاکە لە پێنج بەشی سەرەکی لەناو ئۆفیسدا پێکدێت: خزمەتگوزاریی کڕیاران، شوێنگرتن، ژمێریاری، بەبازاڕکردن و کارگێڕی. هەروەها ئاماژەی بەوە دا کە فلای هەولێر خاوەنی تیمی میوانداریی تایبەت بە خۆیەتی کە لەناو فڕۆکەکاندا کار دەکەن.

دواتر، خاتوو هۆزار هاوبەش شێوازی جێبەجێکردنی ئەرکە ڕۆژانەکانی تیمەکەی ڕوون کردەوە و تیشکی خستە سەر ئەپڵیکەیشنی مۆبایلی فلای هەولێر، بە ئاماژەدان بەوەی کە خزمەتگوزاریی کڕیاران 24 کاتژمێر کار دەکات بۆ خزمەتکردنی گەشتیاران. هەروەها باسی لەوە کرد کە کۆمپانیاکە خاوەنی چەندین نووسینگەی نێودەوڵەتییە، لەوانە ئۆفیسی سکاندیناڤیا، بریکاری (G.S.A) لە ئیستەنبوڵ، ئۆفیسی دۆسڵدۆرف و ئەمستەردام، کە هەموویان کار بۆ خزمەتکردنی کڕیاران و پشتیوانیی پرۆسەکانی کۆمپانیا دەکەن. لە کۆتایی سەردانەکەدا، فێرخوازان و مامۆستای سەرپەرشتیار سوپاسی تیمی فلای هەولێریان کرد بۆ میوانداریی گەرم و پێشکەشکردنی زانیارییە بەنرخەکانیان.