سەرۆکى دەستەی سەربەخۆی مافی مرۆڤ سەردانى زانکۆی جیهان-هەولێر دەکات
بەئامانجى تاوتوێکردنى یاداشتی لێکتێگەیشتن و، ئەنجامدانى کاری هاوبەش بۆ بڵاوکردنەوەی هۆشیاری مافەکانی مرۆڤ، ڕۆژی یەکشەممە ڕێکەوتى (٢٧/٨/٢٠٢٣) شاندێکی دەستەی سەربەخۆی مافی مرۆڤ بەسەرۆکایەتی دکتۆرە مونایاقۆ سەرۆکی دەستە سەردانی زانکۆی جیهان-هەولێرى کرد.
لە دیدارێکدا، کە لە نێوان پڕۆفیسۆر دکتۆر ئەمجەد سابر دەلۆ سەرۆکى زانکۆى جیهان و، دکتۆر نوزاد باجگر سەرۆکی دەستەی ئەمینداریەتی زانکۆ و پەیمانگەکانی جیهان لەلایەک و، دکتۆرە مونایاقۆ سەرۆکى دەستەی سەربەخۆی مافی مرۆڤ لەلایەکى دیکە بەڕێوەچوو، لەسەرەتادا سەرۆکی دەستە ئامانجی سەردانەکەی ڕونکردەوە و ڕایگەیاند: زانکۆ و دەستەى مافى مرۆڤ دوو دامەزراوەى گرنکی ناو کۆمەڵگەن و پەیوەندی ڕاستەوخۆیان هەیە لەگەڵ خەڵک و جەماوەر هەیە، وتیشى فێرخوازانى زانکۆ دەتوانن ڕۆڵی گەورە ببینن لە هۆشیار کردنەوەی هاۆڵاتیان، بۆ ئەوەش وتى: وەک دەستەى سەربەخۆى مافى مرۆڤ دەمانەوێ بۆ کاری هاوبەش هاوکارمان بن، تا بتوانین سود لە توانای یەکتر وەربگرین بۆ بەڕێوەبردنى چالاکی و کۆنفڕاس و ئەنجامدانی توێژینەوە لەبارەى دیاردە کۆمەڵایەتیەکان و، ڕاهێنانی مامۆستا و فێرخوازان، بۆ ئەوەش پێشنیازى ئیمزاکردنى یاداشتی لێکتێگەیشتن دەستەى سەربەخۆى مافى مرۆڤ و زانکۆى جیهان-هەولێرى کرد.
لە بەرامبەردا، سەرۆکى زانکۆى جیهان-هەولێر دواى بەخێرهێنانى شاندى میوان، بەگرنگیەوە باسی لە ڕۆڵى دەستەى سەربەخۆى مافى مرۆڤ کرد بۆ بڵاوکردنەوەی هۆشیاری مافەکانی مرۆڤ، دوپاتیشی کردەوە زانکۆ بەشێوەیەکى گشتى و زانکۆى جیهان بەتایبەت تەنها ناوەندێک نین بۆ خوێندن، بەڵکو وەک دامەزراوەیەکى ڕۆشنبیرى گشتى دەتوانن ڕۆڵى گەورە لە هۆشیارکردنەوەى تاک و کۆمەڵگە بگێڕێ و، فێرخوازان لەبارەى ڕێزگرتن لە دید و بیری جیاواز ڕابهێنێ، بەئامانجى بڕوابون بەمافەکانی مرۆڤ و یەکتر قبوڵ کردن، هەروەک ئامادەیی زانکۆی جیهانی بۆ واژووکردنی یاداشتى لێکتێگەیشتن بۆ کاری هاوبەش دوپاتکردەوە .
هەر لەو کۆبونەوەیەدا، سەرۆکی دەستەی ئەمینداریەتى زانکۆ و پەیمانگەکانی جیهان خۆشحاڵى خۆى بەسەردانى شاندى دەستەى مافى مرۆڤ بۆ زانکۆى جیهان دەربڕى و، وتى: وەک دامەزراوەى جیهان خۆشحاڵ دەبین پەیوەندیمان لەگەڵ دامەزراوە جیاکان هەبێت لەناویشاندا مافى مرۆڤ، ڕونیشیکردەوە زانکۆکانى جیهان لە هەولێر و سلێمانى و دهۆک ئامادەن بۆ هەموو جۆرە چالاکیەکى کۆنفرانس و وۆرکشۆپ و سمینار و خولى ڕاهێنان لە بوارەکانى مافى مرۆڤ لەگەڵ دەستەى سەربەخۆى مافەکانى مرۆڤ؛ خۆشحاڵى خۆشیى پیشاندا لە بەر ڕۆشنایی واژووکردنی یاداشتى لێکتێگەیشتن کارەکانیان بۆ خزمەتکردنى کۆمەڵگە بەڕێوەبەرن .
