فێرخوازانى نیوتریشن و دایەتێتیکس لە بنکەى تەندروستى برایەتى ئاشنایی ڕێوشوێنەکانى چاودێرى تەندروستى دەبن
لە چوارچێوەى چالاکیە زانستیەکانى سەرۆکایەتى بەشى نیوتریشن و دایەتێتیکس لە زانکۆى جیهان-هەولێر بۆ ساڵى نوێى خوێندنى (٢٠٢٣-٢٠٢٤)، کە بۆ فێرخوازان لە قۆناغە جیاکانى دایڕشتوە، فێرخوازانى قۆناغى چوارەم سەردانى (بنکەى تەندروستى برایەتى)یان لە شارى هەولێر کرد.
ڕۆژى پێنچ شەممە ڕێکەوتى (٢٨/٩/٢٠٢٣) بەسەرپەرشتى دکتۆرە هاژە هۆشیار محەمەد و بەئامادەبونى مامۆستاى یاریدەدەر ڕەغد ئەلجۆمەرد، فێرخوازانى قۆناغى چوارەم لە بنکەى تەندروستى برایەتى چەند بەشێکیان بەسەرکردەوە، بەتایبەت بەشەکانى سەنتەرە سەرەتاییەکانی چاودێری تەندروستی و چۆنیەتی ئەنجامدانی پشکنیەکان و بەشی ڤاکسین و بەشی چاودێری دووگیان، بەشی منداڵانی قوتابخانە، بەشی خۆشگوزەرانی گەورەساڵان و بەشی خۆراک.
هەر لە میانەى سەردانەکەیاندا؛ فێرخوازان بە یارمەتی پسپۆڕانی سەنتەرەکە ئاشناى ئەو هەنگاوە پراکتیکانە بوون، کە بۆ چاودێریکردنی نەخۆشەکان بەکاردەهێنران، ئەوەش بەپێی پێداویستییەکانیان و چۆنیەتی پێشکەشکردنی یارمەتی پزیشکی، لەوانەش هۆشیارى بەکارهێنانى خۆراک بۆ قۆناغە جیاوازەکانی تەمەنی، بەتایبەتی ژنانی دووگیان، و بەساڵاچووان و منداڵان بەتایبەت.
