لە زانکۆى جیهان-هەولێر بەسەرکەوتویی کۆتایی بە خولی ڕاهێنانی پەرەپێدانی کارامەییەکانی پەیوەندیی بۆ بەڕێوەبەرەکانى کۆمپانیای “اليسرة” هات

ڕۆژی دووشەممە ڕێککەوتی 31/08/2026، لە زانکۆى جیهان-هەولێر، کۆتایی بە دووەمین خولی ڕاهێنانی پسپۆڕیی هات کە بە ناونیشانی “پەرەپێدانی کارامەییەکانی پەیوەندیی و گەیاندن لە نێوان کارگێڕیی و فەرمانبەران لە کۆمپانیای ئەلیسەرە “اليسرة”  بۆ بازرگانیی کەرەستەی خۆراکی” بەڕێوەچوو.

ئەم خولە لەلایەن سەرۆکایەتى بەشى ڕاگەیاندن لەگەڵ بەشى کارگێڕی کار بۆ 10 لە بەڕێوەبەری لقەکانی کۆمپانیاکە لە پارێزگاکانی جیهان و عێراق ڕێکخرابوو.  لە ماوەى خولەکەدا جەخت لەسەر پێدانی کارامەییەکانی پەیوەندیی کارگێڕیی مۆدێرن، داینامیکی بەڕێوەبردنی تیمی کار و میکانیزمەکانی چارەسەرکردنی ململانێکان و ئاسانکاریی لە گواستنەوەی زانیارییەکان کرایەوە.

 لە لایەکی دیکەوە، لە کۆتایی بەرنامە ڕاهێنانەکەدا، بەشداربووان لە ڕێگەی ئینتەرنێت  (Online)ـەوە هەڵسەنگاندنێکی زانستى وردیان بۆ کرا، کە تێیدا سیستمێکی تاقیکردنەوە لەبەر ڕۆشنایی توێژینەوەی حاڵەتە پراکتیکییەکان (Case Studies) پەیڕەو کرا. بۆ ئەم مەبەستەش، بۆ هەر بەڕێوەبەرى لقێک حاڵەتێکی ڕاستەقینە لە ژینگەی کارکردنی کۆمپانیای ئەلیسەرە دیاری کرا، تاوەکو توانای بڕیاردان و جێبەجێکردنی کارامەییەکان لە ژینگەی کارکردنی ڕاستەقینەدا بپێورێت.

لە کۆتایی چالاکییەکەدا، زیاد تاریق بەڕێوەبەری کارگێڕیی لە کۆمپانیای ئەلیسەرە، سوپاس و پێزانینی خۆی ئاڕاستەی زانکۆى جیهان-هەولێر کرد و، دەستخۆشی لە ئاستی بەرزی ئەکادیمیی و دڵسۆزیی مامۆستایان و ستافی ڕاهێنەری هەردوو بەشەکە کرد. ئاماژەی بەوەشدا کە ئەم خولە دووەم وێستگەیە لە چوارچێوەی ڕێککەوتنامەیەکی ستراتیژیی نێوان هەردوولا، بڕیار وایە زنجیرەیەک خولی ڕاهێنانی پسپۆڕیی کە لە 15 خول پێکدێت بۆ پەرەپێدانی سەرمایەی مرۆیی کۆمپانیاکە لە بوارەکانی کارگێڕیی، مارکێتینگ و پەیوەندییەکان ئەنجام بدرێت.

کۆمپانیای ئەلیسەرە یەکێکە لە گەورەترین دامەزراوە بازرگانییەکان لە بازاڕی عێراقدا، کە خاوەنی 890 فەرمانبەرە و بریکاری سەرەکیی 20 مارکەی بازرگانیی جیهانی و ناوخۆییە لە کەرتی کەرەستەی خۆراکیدا. چالاکییەکە بە دابەشکردنی بڕوانامەی بەشداریی بەسەر بەڕێوەبەری لقەکان و تۆمارکردنی سەرنج و پێشنیازەکان بۆ خولەکانی داهاتوو کۆتایی پێ هات.