بەئامادەبونى پرۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر وۆرکشۆپێک لەبارەى داهاتووى ژینگە بەڕێوەچوو

لە چوارچێوەى کار و پرۆژەکانى سەرۆکایەتى زانکۆى جیهان-هەولێر بۆ جێبەجێکردنى (١٧) ئامانجى نەتەوەیەکگرتووەکان تایبەت بە پەرەپێدانى بەردەوام، لە زانکۆى جیهان-هەولێر وۆرکشۆپێک بەناونیشانى “داهاتوویەکى سەوز: وۆرک شۆپێک لەسەر پراکتیزە بەردەوامەکان” بەڕێوەچوو.

ئەمڕۆ چوارشەممە ڕێکەوتى (١٦/١٠/٢٠٢٤) لە هۆڵى کۆنفرانسەکانى زانکۆ، بەئامادەبوونى پرۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر و، یاریدەدەرانى سەرۆکى زانکۆ و مامۆستایان و، ژمارەیەکى زۆر لە فێرخوازان، ڕاگرایەتى کۆلێژى زانستە کارگێڕى و داراییەکان بەهاوبەشى لەگەڵ (مەیپڵ تر بۆ گەشەپێدانى کۆمەڵگە و بڵاوکردنەوەى هۆشیارى ژینگەیی) وۆرکشۆپێک بەڕێوەچوو.

لەسەرەتاى وۆرکشۆپەکەدا، پرۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر وتارێکى پێشکەشکرد و وتى: خۆشحاڵم ئەمڕۆ کۆلێژێکى زانکۆکەمان لەگەڵ ڕێکخراوێک هەوڵ دەدات لەسەر ئاستێکى جیهانى داهاتویەکى پڕشنگدار بۆ نەوەکانى داهاتومان دابین بکات، ئاشکرایە ئەو (١٧) ئامانجەى کە لەلایەن نەتەوەیەکگرتوەکانەوە دانراوە، هەموو سەرکردەکانى جیهان سورن لەسەر ئەوەى تا ساڵى (٢٠٣٠) خاڵەکانى جێبەجێ بکرێن، وتیشى: ئێمەش وەک دەزگایەکى زانستى لەسەر ئاستى عێراق و هەرێمى کوردستان، کە ڕۆڵێکى دیارى و بەرچاومان لە پەروەردەکردنى فێرخوازان بۆ دواڕۆژ هەیە، بۆیە ئەرکەکانمان تەنها بریتی نیە لە پەروەردەکردن بەڵکو بریتیە لە جێبەجێکردنى ئەو (١٧) ئامانجەش، بۆ ئەو مەبەستەش لێژنەیەک و بۆردێکمان بەجیا پێکهێناوە، کە نوێنەرى وڵاتانى دەرەوەشى لەخۆگرتوە بۆ ئەوەى زانکۆى جیهان-هەولێر بتوانێ جێگەى خۆى بکاتەوە لەناو ئەو (١٧) ئامانجەى کە هەیە و پێى دەڵێن (کورسى)، سەرۆکى زانکۆى جیهان-هەولێر وتى: ئێستا لەهەر زانکۆیەک بپرسی دەڵێ ئەوەندە کورسیم هەیە، بۆیە لێژنەکەى ئێمەش کار و هەنگاوى باشیان ناوە و، (٥) پێنچ ئامانجیان وەک قۆناغى یەکەم دیاریکردوە و بە چڕى کارى لەسەر دەکەن بۆ ئەوەى بتوانین کورسیەک لە نەتەوەیەکگرتوەکان بەدەست بهێنین.

پرۆفیسۆر دکتۆر ئەمجەد سابر دەلۆ وتیشى ئەم پرۆسەیە بەتەنها کارى زانکۆ نیە، بەڵکو کارى زانکۆ و ئەو ڕێکخراوەە بەڕێزە و فێرخوازان و کۆمەڵگەشە، چونکە هەمومان پێکەوە بۆ ئەوە کاردەکەین تا کۆمەڵگە بگەێنینە ئاستى داواکار لەو (١٧) ئامانجە، وتیشى ئەم وۆرکشۆە یەکێکە لە وۆرکشۆپە هەر گرنگەکان تا بەهۆیەوە بتوانین بنەمایەک دابنێین بۆ بەرەوپێشبردنى کۆمەڵگەکەمان، چونکە هەرێمى کوردستان هیچى لە وڵاتان و کۆمەڵگەکانى دکە کەمتر نیە، دامەزراوەکانمان هیچیان لە دامەزراوەى وڵاتان کەمتر نین، ژینگى ئێمەش ئامادەیە بۆ پیادەکردنى ئەو کارانە، چونکە ژێرخانێکى پتەو و باشمان هەیە بۆ ئەوەى ئەو (١٧) ئامانجە بەدى بهێنین.

سەرۆکى زانکۆى جیهان-هەولێر بەشێکى دیکەى وتارەکەى تەرخانکرد بۆ ئەو کار و پڕۆژانەى لە ڕابردو جێبەجێیان کردوە و، بۆ ئەوەش وتى: لە زانکۆى جیهان-هەولێر بۆ کۆمەککردنى هەژار و لێقەومان و ئەوانەى پێویستیان بە هاوکارى و دەستگیرۆیی هەیە، کۆمەڵێک پرۆژەى گرنگە جێبەجێ کراوە، بەتایبەت لە نۆژەنکردنەوەى قوتابخانەکە و ئەنجامدانى چالاکى خۆبەخشى و خێرخوازى لە مانگى ڕەمەزان، هەموو ئەوانەش بە هەوڵ و کۆششى مامۆستایان و فێرخوازان بووە، ئەمانە بەشێکن لەو ئامانجانە، ڕونیشیکردەوە، کە بەرنامەى ساڵى داهاتوو بریتى دەبێ لەوەى کار و پرۆژەى گەورەتر و زیاتر جێبەجێ بکەین، ئەوەش بە پاڵپشتى فێرخوازان و مامۆستایان و خێزان و کەسوکارەکانیان تاوەک هەر ئاستى وڵاتێکى پێشکەوتوو نموونە جوانەکانى خۆمان پیشان بدەین و ببینە بەشێک لە پرۆژەیەکى جیهانى.

پاشان بەرنامەى کارى وۆرکشۆپەکە دەستپێکرد، بۆ ئەوەش مامۆستاى یاریدەدەر  ئەزوەر مەهدى سەرۆکى بەشى ڕاگەیاندن بابەتێکى بەناونیشانى سەرەتایەک دەربارەى  (شۆردنی سەوز و بەبازاڕکردنی سەوز) پێشکەشکرد، هەروەها هاکار بارزانى بەڕێوەبەرى ڕێکخراوى (مەیپڵ ترى بۆ گەشەپێدانى کۆمەڵگە و بڵاوکردنەوەى هۆشیارى ژینگەیی) بابەتێکى لەبارەى (بونیادنانى داهاتویەکى بەردەوام: ڕێکخستنی ئەرکەکەمان  لەگەڵ کردەوەی تاکەکەسی) پێشکەشکرد، دواتریش مامۆستاى یاریدەدەر زەینەب شێخلى باسى لە بەردەوامیی و پەروەردەی سەرەتایی کرد، هەروەها جەلال بارفین لە ڕێکخراوى (مەیپڵ ترى) تیشکى خستە سەر وزەی نوێبووەوە و کاریگەرییەکانی لەسەر ژینگە و ئابووری، هەروەک مامۆستاى یاریدەدەر موسلم نەجیب زێدان بەوردى و زانستى ڕونکردنەوەى لەبارەى بنەماکانی بەڕێوەبردنی ژینگە: لایەنە پەیوەندیدارەکان، کاریگەرییەکان، و چارەسەرە بەردەوامەکان پێشکەش بە ئامادەبووان کرد، دواتریش ئامادەبوان گفتوگۆى چڕیان لەسەر ناوەڕۆکى بابەتەکان کرد.

لە کۆتایی وۆرکشۆپەکەدا، بڕوانامەى ڕێز و سوپاس پێشکەش بەو فێرخوازانەى زانکۆى جیهان-هەولێر کرا، کە لەماوەى ڕابردودا بەشێوەیەکى خۆبەش هاوکار  و هەماهەنگى ڕێکخراوى (مەیپڵ ترە)یان کردوە و، چالاکى جۆراوجۆریان بەڕێوەبردوە.