تیمی فوتساڵی فێرخوازانى زانکۆی جیهان-هەولێر لە “پاڵەوانیەتیی فوتساڵی کیا بۆ زانکۆکانی کوردستان” ئاستێکى بەرزیان پیشاندا

ڕۆژی سێشەممە ڕێکەوتی (١٦ی حوزەیرانی ٢٠٢٦)، تیروپشکی “پاڵەوانیەتیی فوتساڵی کیا بۆ زانکۆکانی کوردستان” لە هۆڵی دکتۆر سائیر عەبدولئەحەد بەڕێوەچوو، لەسەر ئاستی زانکۆى جیهان-هەولێر، هەردوو ڕاهێنەر پڕۆفیسۆر دکتۆر (ئەکرەم عەبدولواحید) و مامۆستای یاریدەدەر (ئەحمەد سەعید) مامۆستایانى بەشى پەروەردەى جەستەیی و زانستە وەرزشییەکان ئامادەی تیروپشکى پاڵەوانیەتیەکە بوون.

پاڵەوانیەتیی فوتساڵی کیا بۆ زانکۆکانی کوردستان، کە لە لایەن کۆمپانیای کیا مۆتۆرز سپۆنسەری کراوە، تیپی فوتساڵی زانکۆی جیهان-هەولێر بەشداری لە پاڵەوانیەتیەکەدا کرد، لە یەکەم یاریدا، کە بەئامادەبونى دکتۆر ئەحمەدعبدالعون سەرۆکى بەشى پەروەردەى جەستەیی و زانستە وەرزشیەکان لە هۆڵی دووەمی کۆلێژی پەروەردەی جەستەیی و زانستە وەرزشییەکانی زانکۆی سەڵاحەدین-هەولێر بەڕێوەچوو، تیمی زانکۆی جیهان-هەولێر ڕووبەڕووی تیمی زانکۆی کۆیە بووەوە. یارییەکە لە سەرەتاوە کێبڕکێیەکی توندی بەخۆیەوە بینی و گێمی یەکەم بە یەکسانبوونی هەردوولا بە ئەنجامی (١-١) کۆتایی هات. بەڵام لە گێمی دووەمدا و دوای پێدانی ڕێنماییە تەکتیکییەکانی ستافی ڕاهێنەران، یاریزانانی زانکۆی جیهان-هەولێر گەڕانەوەیەکی مێژووییان (Remontada) تۆمار کرد و توانییان یارییەکە بە ئەنجامی شایستەی (٣-١) لە بەرژەوەندی خۆیان کۆتایی پێ بهێنن و سەرکەوتن بۆ قۆناغی دواتر مسۆگەر بکەن.

بەپێی سیستەمی داڕژراوی پاڵەوانیەتییەکە، تیمی زانکۆى جیهان-هەولێر لە کاتژمێر (٠٧:٠٠)ی ئێوارەی هەمان ڕۆژدا و بەبێ وەرگرتنی پشووی پێویست، ڕووبەڕووی تیمی زانکۆی سەڵاحەدین-هەولێر بووەوە. لەم یارییەدا، تیمی ڕکابەر سوودی لە دوو خاڵی یەکلاکەرەوە وەرگرت؛ یەکەم: سوودوەرگرتن لە ماندووبوونی جەستەیی یاریزانانی زانکۆی جیهان-هەولێر کە یارییەکی قورسیان ئەنجامدابوو لە کاتێکدا یاریزانانى زانکۆی سەڵاحەدین-هەولێر لە یاری یەکەمدا پشویان دابوو، دووەم: سوودوەرگرتن لە فاکتەری یاریگە و هاندەران. سەرەڕای هەوڵە بێوچانەکانی یاریزانانی زانکۆى جیهان-هەولێر بۆ پاراستنی ئەنجامەکە، بەڵام ماندوێتی زۆر کاریگەریی گەورەی هەبوو و یارییەکە لە بەرژەوەندی یاریزانانى زانکۆی سەڵاحەدین-هەولێر کۆتایی هات.

لەم قۆناغی پاڵەوانیەتیی فوتساڵی کیا بۆ زانکۆکانی کوردستان دوو تیپ لەسەر ئاستی پارێزگاکە سەردەکەون بۆ قۆناغی کۆتایی (کە بە بەشداری ٨ زانکۆ بەڕێوەدەچێت) و کۆمپانیای کیا وەک خەڵاتێکی تایبەت، گەشتێکی یەک هەفتەیی بۆ وڵاتی تورکیا بۆ تیمی پاڵەوانی خولەکە دابین دەکات.

 تیمی زانکۆی جیهان-هەولێر دوای پێشکەشکردنی ئاستێکی وەرزشیی بەرز و شایستە، لە قۆناغی پێش کۆتایی ماڵئاوایی لە جامی “کیا” کرد، کە ئەمەش ئەزموونێکی گرنگ بوو بۆ بەهێزکردنی توانای یاریزانان و نوێنەرایەتیکردنی شایستەی زانکۆ لە کایە وەرزشییەکاندا.