فێرخوازانى بەشى ڕاگەیاندن لە کەناڵى (One News) ئاشنای کارى مەیدانى ڕاگەیاندن دەکرێن

بۆ زیاتر لە نزیکەوە ئاشنابون بەژینگەى کارکردنى داهاتویان و، چۆنیەتى مامەڵەکردنى میدیاکاران لە دامەزراوەکانى ڕاگەیاندن لەگەڵ هەواڵ و بابەتەکانى ڕۆژ، سەرۆکایەتى بەشى ڕاگەیاندن لە زانکۆى جیهان-هەولێر گەشتێکى زانستى بۆ فێرخوازانى ڕێکخست.

ڕۆژى یەکشەممە ڕێکەوتى (١٣/٣/٢٠٢٢) بەسەرپەرشتى مامۆستاى یاریدەدەر هێمن ئەمین شوانى، فێرخوازانى قۆناخى دووەمى بەشى ڕاگەیاندن، لە شارى هەولێر کەناڵى ئاسمانى (One News)یان بەسەرکردەوە.

بەگەیشتنیان لەلایەن ئەحمەد ڕەبیع بەڕێوەبەرى ژوورى هەواڵ پێشوازیان لێکرا، پاشان ئەحمەد ڕەبیع دواى بەخێرهێنانى مامۆستا و فێرخوازان، کورتەیەکى لەبارەى دامەزراوەکەیان پێشکەش بەفێرخوازان کرد، هەروەک ڕونکردنەوەى پێویستى لەبارەى ئەرکەکانى ژوورى هەواڵ بەگشتى و لەکەناڵەکەیان بەتایبەت پێشکەش بەفێرخوازان کرد و ڕایگەیاند: ژوورى هەواڵ لەهەر دامەزراوەیەکى ڕاگەیاندن بەپایەکى گرنگ دادەنرێ، بۆیە لە کەناڵى (One News) یش ئێمە ڕۆژانە لە ڕێگەى تیمێکى تایبەت لە ژوورى هەواڵ بەهاوبەشى (7) پەیامنێر لە (7) پارێزگاى هەرێمى کوردستان و خوار و ناوەڕاستى عێراق ڕوماڵى ڕوداو و بابەتەکانى ڕۆژ لەسەر ئاستى عێراق و هەرێمى کوردستان و جیهان بەزمانى عەرەبى دەکەین، هاوکات کۆمەڵێک بەرنامەى سیاسى ڕۆژانە و هەفتانەمان هەیە بۆ شیکردنەوەى دیوى دووەمى هەواڵ و ڕوداوەکان بەمیواندارى کەسانى شارەزا و پسپۆڕ و پەیوەندیدار بەبابەتەکان، لە بەشێکى دیکەى قسەکانیدا بەڕێوەبەرى ژورى هەواڵ بەشێوەیەکى مەیدانى باسى ئەرکى بێژەرەکانى هەواڵ و پەیامنێران و سەرنوسەرى هەواڵ و کارمەندانى ژورى هەواڵى بۆ فێرخوازان کرد و، هانى فێرخوازانیشیدا ئەو زانیارى و زانستەى لە زانکۆ وەرى دەگرن هەوڵدەن لە ژیانى مەیدانى پراکتیزەى بکەن.

لە وێستگەیەکى دیکەى سەردانەکەیاندا، فێرخوازان بەشەکانى سوشیال میدیا و ژورى کۆنتڕۆڵ و ستۆدیۆکانى کەناڵەکەیان بەسەرکردەوە، لەو چوارچێوەیەشدا لەلایەن مەلیک بابان بەڕێوەبەرى ستۆدیۆ باسى لە چۆنیەتى ڕایکردنى کاروبارەکانى ستۆدیۆ و ئەو بەرنامە و هەواڵانە کرد، کە لە ستۆدیۆکانیان پێشکەش دەکرێت، بۆ ئەوەش ڕونیکردەوە ڕۆژانە لە (٥) کاتژمێرى جیا هەواڵەکان بڵاودەکەنەوە و، هەروەک بۆ بابەتە تایبەتەکانیش ڕوماڵى تایبەتیان دەبێ، هاوکات هەر لە ستۆدیۆکان چەند بەرنامەیەکى جۆراوجۆریان هەیە، ڕونیشکردەوە بۆ هەر بەرنامەیەک لۆکەیشنى تایبەتیان هەیە، بۆ هەواڵەکانیش بەهەمان شێوە، هەر لە میانەى قسەکانیدا مەلیک بابان ڕونکردنەوەى تەواوى لەبارەى چۆنیەتى کارکردن و هەماهەنگیکردنى کارەکانى ستۆدیۆ لە دەنگ و کامیرا و ڕوناکى و نوسینى هەواڵ و دەرهێنەر و کۆنتڕۆڵ بەشێوازێکى مەیدانى بۆ فێرخوازان باسکرد.

لە کۆتایدا، مامۆستاى یاریدەدەر هێمن ئەمین شوانى بەناوى سەرۆکایەتى بەشى ڕاگەیاندن سوپاسى لێپرسراوانى کەناڵەکەى کرد بۆ ئەو پێشوازییە و پێشکەشکردنى زانیارى و ڕونکردنەوەکان بەفێرخوازان و ئاشناکردنیان بەکارى مەیدانى تەلەفزیۆن.