فێرخوازانى زانکۆى جیهان-هەولێر بەشدارى لە یەکەمین فیستیڤاڵی كەركوك بۆ تەکنەلۆژیا و داهێنان دەکەن
بۆ دەڕخستنى تواناى فێرخوازانى زانکۆکانى هەرێمى کوردستان و عێراق و، دەستنیشانکردنى باشترین پڕۆژەى فێرخوازان، بەبەشدارى فێرخوازانى زانکۆى جیهان-هەولێر یەکەمین فیستیڤاڵی كەركوك بۆ تەکنەلۆژیا و داهێنان دەستى بەکارەکانى خۆى کرد.
لە یەکەم ڕۆژى فیستیڤاڵەکەدا، کە ڕۆژى یەک شەممە ڕێکەوتى (١٣/٣/٢٠٢٢) لە هۆڵى سێنتەرى ڕۆشنبیرى کەرکوک بەڕێوەدەچێ، بەپێشکەشکردنى چەند وتارێک کارنامەکە دەستپێکرد، پاشان بەشداربوان بەشە جیاکانى فیستیڤاڵەکەیان بەسەرکردەوە، کە لە پاڵ نمایشکردنى داهێنان و بەرهەمە تەکنەلۆژییەکان، کۆمەڵێک کار و بەرهەمى دەستیش نمایش کراون.
لەو فیستیڤاڵەدا، کە ماوەى سێ ڕۆژ بەردەوام دەبێ، لە کۆى (٩٣) پڕۆژەى بوارى تەکنەلۆژیا، کە لە بەشى زۆرى زانکۆکانى عێراقەوە پێشکەش کرابون، تەنها (٣٤) پڕۆژ پەسندکراون و نمایش کراون، لەناویاندا (٢) پڕۆژەى فێرخوازانى بەشى ئەندازياری پرۆگرامسازی وئينفۆرماتيك لە زانکۆى جیهان-هەولێر وەرگیراون و نمایشکراون.
پڕۆژەکانى زانکۆى جیهان-هەولێر لەلایەن فێرخوازان اسامە ابو بكر لە قۆناخى چوارەم و، محمد شيرزاد لە قۆناخى دووەمى بەشى ئەندازياری پرۆگرامسازی وئينفۆرماتيك پێشکەشکراون، پڕۆژەکانیان بۆتە جێى سەرەنجى ئامادەبوانى فیستڤاڵەکە و چەندین کەناڵ و دامەزراوەى ڕاگەیاندن دیدار و چاوپێکەوتنیان لەگەڵ ڕێکخستون و باسى پڕۆژەکانیان کردوە.
واش بڕیارە لە سێیەمین ڕۆژى فیستیڤاڵەکەدا، باشترین پڕۆژە لە کۆى (٣٤) پڕۆژەکە ڕابگێندرێ، ئەوەش دەبێتە دەرەفتێکى زێرین بۆ ئەوەى فێرخوازان بتوانن پڕۆژەکانیان بەشێوەیەکى پراکتیکى جێبەجێ بکەن.
فیستیڤاڵی كەركوك بۆ تەکنەلۆژیا و داهێنان بەیەکەمین فیستیڤاڵى بوارى تەکنەلۆژیا دادەنرێ، کە تواناى فێرخوازانى زانکۆکانى تێدا نمایش دەکرێ و، لەلایەن کۆمەڵێک دامەزراوەى حکومى و کەرتى تایبەت ڕێکخراوە.
