لە مەراسیمێکدا، لە زانکۆى جیهان-هەولێر بڕوانامەى دەرچوون بەسەر بەشداربووانى خولى (ریڤیت) دابەشکرا
ڕۆژى سێ شەممە ڕێکەوتى (٢٩/١١/٢٠٢٢) لە هۆڵى (VIP)ى زانکۆى جیهان-هەولێر، لە مەراسیمێکدا بڕوانامەى دەرچوون بەسەر ئەندازیارانى بەشداربوى خولى راھێنانی ریڤیت (Autodisk Revit )دابەشکرا.
لەو مەراسیمەدا، کە بەئامادەبوونى پڕۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر و، ئەندازیارى عبدالرحمن علی کوردە نەقیبی ئەندازیارانى کوردستان و، دکتۆر مەیسون ئەلحەیدەری یاریدەدەری سەرۆكی زانكۆ بۆ كاروباری زانستی و، دکتۆر عەبدولستار کەریم یاریدەدەری سەرۆكى زانکۆ بۆ كاروباری كارگێڕی و فێرخوازان و، بۆتان طاھر خۆشناو بەرپرسی پەیوەندییەکان و راھێنان و پێگەیاندن لە سەندیکاى ئەندازیاران و سەرۆکى ژمارەیەک لە بەشە زانستیەکانى زانکۆ بەڕێوەچوو، پڕۆفیسۆر دکتۆر صبيح هاشم سەرۆکى بەشى ئەندازیارى تەلارسازى بەناوى سەرۆکایەتى زانکۆ بەخێرهاتنى ئامادەبوان و ئەندازیارانى کرد، پاشان ئاماژەى بەچۆنیەتى بەڕێوەچونى خولەکە کرد و، وتى: خوولی راھێنانی (ریڤیت)، کە ئەندازیارانی تەلارسازی و شارستانی ئەندامانى سەندیکاى ئەندازیارى تیایدا بەشداربوون ماوەی سێ ھەفتە بەردەوام بوو، ڕۆژانە لەلایەن مامۆستایانى بەشەکانى ئەندازیارى تەلارسازی و شارستانی لە زانکۆى جیهان-هەولێر وانەکان بەشێوەى تیۆرى و پراکتیکى پێشکەش بە ئەندازیاران دەکرا، خۆشحاڵى خۆشى دەربڕى کە پەیوەندییەکانى زانکۆى جیهان-هەولێر لەگەڵ سەندیکاى ئەندازیارانى کوردستان لە چوارچێوەى ئەو ڕێکەوتنامەیەى ئیمزا کراوە چۆتە قۆناغێکى نوێوە.
پاشان، لەلایەن هەریەک پڕۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر و، ئەندازیارى عبدالرحمن علی کوردە نەقیبی ئەندازیارانى کوردستان و، ، دکتۆر عەبدولستار کەریم یاریدەدەری سەرۆكى زانکۆ بۆ كاروباری كارگێڕی و فێرخوازان بڕوانامەى دەرچوون بەسەر بەشداربووانى خولى راھێنانی ریڤیت (Autodisk Revit )دابەشکرا و، پیرۆزباییان لێکرا.
ڕۆژى یەک شەممە ڕێکەوتى (٦/١١/٢٠٢٢) لە زانکۆى جیهان-هەولێر خولى راھێنانی ریڤیت (Autodisk Revit ) بۆ ژمارەیەک لە ئەندامانى سەندیکاى ئەندازیارانى کوردستان کرایەوە، هەروەک ڕۆژى پێنچ شەممە ڕێکەوتى (١٧/١١/٢٠٢٢) بەئامانجى توندوتوڵکردنى پەیوەندییەکانى نێوان و، داڕشتنى نەخشەڕێى کارى هاوبەشى نێوانیان و سوود وەرگرتن لە ئەزمونى یەکتر لە بوارى ئەندازیارى، سەرۆکى زانکۆى جیهان-هەولێر نەقیبى ئەندازیارانى کوردستان ڕێکەوتنامەیەکى هاوبەشیان ئیمزا کرد.
