گۆڤاری زانکۆی جیهان-هەولێر بۆ زانستەکان لە ڕاپۆرتی فاکتەری کاریگەریی عەرەبی بۆ ساڵی 2026 پلەی Q2 بەدەست هێنا
دەستکەوتی زانستی دیکە و بەرزبوونی فاکتەری کاریگەری
فاکتەری کاریگەریی عەرەبی (Arab Impact Factor) ڕاپۆرتی ساڵانەی خۆی بۆ ساڵی 2026 بڵاو کردەوە. لە چوارچێوەی ئەم ڕاپۆرتەدا، گۆڤاری زانکۆی جیهان-هەولێر بۆ زانستەکان دەستکەوتێکی زانستیی بەرچاو و شایستەی بەدەست هێنا؛ بە جۆرێک فاکتەری کاریگەریی عەرەبیی گۆڤارەکە لە (1.3) بەرز بووەوە بۆ (2.09)، واتا بە ڕێژەی زیاتر لە 60% بەرزبووەتەوە.
بەمەش گۆڤارەکە لە کاتیگۆریی سێیەمەوە (Q3) گوێزرایەوە بۆ کاتیگۆریی دووەم (Q2)، تاوەکو ببێتە یەکێک لە گۆڤارە زانستییە بەکاريگەرەکانی سەر ئاستی جیهانی عەرەبی.
پەرەسەندنی سیستماتیکیی بڵاوکردنەوە لە زانکۆدا
ئەم دەستکەوتە هاوکاتە لەگەڵ بەرزبوونەوەی گۆڤاری زانکۆی جیهان-هەولێر بۆ زانستە مرۆڤایەتی و کۆمەڵایەتییەکان بۆ هەمان کاتیگۆری، بەوەش زانکۆ خاوەنی دوو گۆڤاری زانستییە لە کاتیگۆریی دووەمدا (Q2) لە ڕاپۆرتی ئەمساڵدا. ئەمەش نیشاندەرێکی ڕوونی پەرەسەندنی تەواوی سیستمی بڵاوکردنەوەی زانستی و سەرکەوتنی سیاسەتی زانکۆی جیهان-هەولێرە لە پاڵپشتیکردنی توێژینەوەی زانستیی ئەکادیمی و بەهێزدا.
هۆکارەکانی پەرەسەندن و بەرزبوونی ئاماژەپێدانەکان
ئەم پێشچوونە دەگەڕێتەوە بۆ چەندین هۆکاری سەرەکی، لەوانە بەرزکردنەوەی پێوەرەکانی وەرگرتن و هەڵسەنگاندنی زانستیی دوولایەنەی نەناسراو (Double-blind peer review)، بەردەوامی لە کاتەکانی بڵاوکردنەوەدا و، ڕادەکێشانی توێژینەوەی جۆری و بەپێز لە ناوەوەی عێراق، هەرێمی کوردستان و وڵاتانی دەرەوە.
سەرباری ئەوەش، ئاستی ئاماژەپێدان (Citation) بە توێژینەوە بڵاوکراوەکانی گۆڤارەکە لە توێژینەوەکانى ئەم دوایینەدا بە شێوەیەکی بەرچاو زیادی کردووە.
ئامانجەکانی ئایندەیی پیرۆزبایی سەرۆکایەتیی زانکۆ
فاکتەری کاریگەریی عەرەبی یەکێکە لە نیشاندەرە سەرەکییە پەسەندکراوەکان کە توێژەران و دامەزراوە ئەکادیمییەکان پشتی پێ دەبەستن بۆ هەڵسەنگاندنی گۆڤارە زانستییە عەرەبییەکان.
بەم بۆنەیەوە، زانکۆی جیهان-هەولێر گەرمترین پیرۆزبایی ئاڕاستەی دەستەی نووسەرانی گۆڤار، هەڵسەنگێنەران و سەرجەم توێژەران دەکات کە بەشدار بون لە هێنانەدیی ئەم دەستکەوتەدا.
هەروەها زانکۆ جەخت لەسەر هەوڵە بەردەوامەکان دەکاتەوە بۆ گەییشتن بە کاتیگۆریی یەکەم (Q1) و بەرفراوانکردنی ئامادەییی گۆڤارەکە لە بنکەدراوە و پێڕستە زانستییە جیهانییەکاندا، بۆ ئەوەش داوا لە ئەکادیمیان دەکات بەردەوام بن لە ناردنی توێژینەوە ڕەسەنەکانیان بۆ خزمەتکردنی ڕێڕەوی توێژینەوەی زانستی.
