فێرخوازانی بەشی ئەندازیاریی دیزاینی ناوخۆیی سەردانێکی زانستییان بۆ فامیلی مۆڵی هەولێر ئەنجام دا

ڕۆژی سێشەممە ڕێککەوتی 22/09/2026، سەرۆکایەتى بەشی ئەندازیاریی دیزاینی ناوخۆیی لە زانکۆى جیهان-هەولێر سەردانێکی مەیدانیی بۆ فێرخوازانی بەشەکە بۆ فامیلی مۆڵی هەولێر ئەنجام دا.

لە کاتی سەردانەکەدا، کە بە سەرپەرشتیی دکتۆر نغەم ئیسماعیل یەحیا بەڕێوەچوو، فێرخوازان بەشەکانی مۆلەکە، ڕێڕەوەکان و ناوچەکانی چێشتخانەیان بەسەرکردەوە، هاوکات لە ڕێکخستن و بەکارهێنانی ئەم بۆشاییانەیان کۆڵییەوە، بەتایبەت لەسەر جوڵەی سەردانیکەران، شوێنەکانی دانیشتن، ڕووناکی و پەیوەندی بۆشاییە ناوخۆییەکان بە توخمە سروشتییەکانەوە. هەروەها فێرخوازان لەگەڵ مامۆستاى سەرپەرشتیار گفتوگۆیان لەبارەی چۆنییەتی سوودوەرگرتن لە سەرنجەکان بۆ پەرەپێدانی پێشنیازە دیزاینییەکان و، دەستنیشانکردنی دەرفەتە گونجاوەکان بۆ بەکارهێنانی شێوازەکانی دیزاینی هاوشێوەکراوی سروشت (Biophilic Design) کرد، بە مەبەستی ڕێکخستنەوەی هەندێک لە بۆشاییە گشتییەکان و باشترکردنی ئەزموونی سەردانیکەران.

لە کۆتایی سەردانەکەدا، فێرخوازان زانیارییە تیۆرییەکانی ناو هۆڵەکانی خوێندنیان بە بینایەکی بازرگانیی ڕاستەقینە لە شاری هەولێر بەستەوە و، سەرنجی مەیدانیی بەنرخیان بۆ پشتیوانیکردنی شیکاری و بڕیارە دیزاینییەکانیان لەبارەی بۆشاییە گشتییەکانی مۆڵەکە پاشەکەوت کرد.