سەرۆکى زانکۆى جیهان-هەولێر لەگەڵ فێرخوازێکى خوێندنى باڵاى پۆڵندى باس لە ئەنجامدانى توێژینەوەیەک لەبارەى (سەربەخۆیی کوردستان) دەکات
پڕۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر ڕایگەیاند: زانکۆى جیهان-هەولێر وەک دامەزراوەیەکى زانستى ئەکادیمى پێشەنگ و تایبەت لە کوردستان وەک ئەرکێکى زانستى و نیشتیمانى لە هەوڵى بەردەوامدا دەبێ بۆ دروستکردنى پردى زانستى زانستی لەگەڵ زانکۆ پێشکەوتوەکانى وڵاتانى جیهان، چونکە لە ڕێگەى زانست دەتوانین خزمەت بەمرۆڤایەتى و کۆمەڵگەکانى یەکتر بکەین.
ئەو ڕاگەیاندنەى سەرۆکى زانکۆى جیهان-هەولێر لە میانەى پێشوازیکردنى لە (ئادریان چارنێکا)، کە فێرخوازێکى خوێندنى باڵایە لە پۆڵندا و، تێزى دکتۆراکەى تایبەت کردوە بەسەربەخۆیی کوردستان.
لە میانەى دیدارێکدا، کە ئەمڕۆ سێ شەممە ڕێکەوتى (٢٤/٥/٢٠٢٢) بەئامادەبوونى یاریدەرانى سەرۆکى زانکۆ و سەرۆکى ژمارەیەک لە بەشە زانستیەکان و مامۆستایان بەڕێوەچوو، ئەو فێرخوازەى پۆڵندا، سوپاسى تایبەتى پێشکەشى پڕۆفیسۆر دکتۆر ئەمجەد سابر دەلۆ و ستافى زانکۆ کرد بۆ ئەو پاڵپشتى و هەماهەنگى زانستى و لۆجیستیانەى پێشکەشى کراوە، وتیشى خۆم بەخۆشحاڵ دەزانم کە تێزى دکتۆراکەم لەبارەى نەتەوەى کورد و سەربەخۆیی کوردستانە، لە بەشێکى دیکەى قسەکانیدا بەوردى باسى لە هۆکارەکانى هەڵبژاردنى بابەتەکەى کرد، هەروەک باسى لە چۆنیەتى بەڕێوەچوونى کارەکانى لە کوردستان کرد.
لە بەرامبەردا، سەرۆکى زانکۆى جیهان-هەولێر دواى بەخێرهێنانى بۆ کوردستان ڕونیکردەوە، ئەرکى زانکۆ تەنها پێگەیاندنى فێرخواز نیە، بەڵکو یەکێکى دیکە لە ئەرکە گرنگەکانى دروستکردنى پردى پەیوەندیە لە نێوان گەلان، ئەوەش لە ڕێگەى ئەنجامدانى توێژینەوەى زانستى و، کۆنفرانسى هاوبەش و ڕاهێنانى زانستى، بۆیە وەک زانکۆى جیهان-هەولێر خۆمان بەخۆشحاڵ دەزانین کە وەک زانکۆیەکى پێشەنگ و تایبەت لە کوردستان هەماهەنگى لەگەڵ فێرخوازێکى نێودەوڵەتى دەکەین بۆ ئەنجامدانى توێژینەوەیەکى زانستى لەبارەى پرسێکى گرنگى گەلەکەمان، کە سەربەخۆى کوردستانە، بۆ ئەو مەبەستەش هەموو جۆرە پاڵپشتى و هەماهەنگى و کارئاسانیەکى زانکۆى جیهان-هەولێری بۆ سەرخستنى توێژینەوەکەى لە کوردستان بۆ دوپات کردەوە، ڕاشیگەیاند: زانکۆى جیهان-هەولێر وەک دامەزراوەیەکى زانستى ئەکادیمى پێشەنگ و تایبەت لە کوردستان و، وەکو ئەرکێکى زانستى و نیشتیمانى لە هەوڵى بەردەوامدا دەبێ بۆ دروستکردنى پردى زانستى زانستی لەگەڵ زانکۆ پێشکەوتوەکانى وڵاتانى جیهان، چونکە لە ڕێگەى زانست دەتوانین خزمەت بەمرۆڤایەتى و کۆمەڵگەکانى یەکتر بکەین، مایەى خۆشحاڵشمانە کە پەیوەندییەکى باشمان لەگەڵ ژمارەیەک لە زانکۆکانى پۆڵندا هەیە.
ئادریان چارنێکا، کە فێرخوازى دکتۆرایە لە فاکەڵتی زانستە سیاسییەکان و توێژینەوەکانی ئاسایش لە زانکۆى نیکۆلاوس کۆپەرنیکۆس لە شارى (ToRUŃ)ى پۆڵندا، کە یەکێکە لە پێنچ زانکۆ پێشەنگەکانى ئەو وڵاتە، لە ئێستادا لە پرۆسەی نووسینی تێزی دکتۆراکەیەتى، کە تایبەت بەسەربەخۆیى کوردستانە بە ناونیشانی (Kurdish Independence Capital in the Middle East).
ئەو فێرخوازە بۆ ئەنجامدانى توێژینەوەکەى بەشێوەیەکى سەرکەوتوانە پێویستى بەهاوکارى و پاڵپشتى لە هەر چوار پارچەى کوردستان هەیە، لەو چوارچێوەیەشدا زانکۆى جیهان-هەولێر هەموو کارئاسانى و پاڵپشتیەکى زانستى و لۆجیستى بۆ دوپاتکردەوە، واش بڕیارە لە ماوەى مانەوەى لە هەرێمى کوردستان لە ڕێکەوتى (23/5 تا 3/6 /2022) بەهاوکارى زانکۆى جیهان-هەولێر بەوردى کار لەسەر ئەنجامدانى توێژینەوەکەى بکات، بۆ ئەو مەبەستەش زانکۆى جیهان-هەولێر داوا لە فێرخوازان و مامۆستایان و فەرمانبەران و هاوڵاتیانى هەرێمى کوردستان بەشێوەیەکى گشتى دەکات لە ڕێگەى ئەم بەستەرە (Survey for PhD research Kurdish Independence (google.com)) بەشدارى لە فۆرمى ڕاپرسى تایبەت بەتوێژینەوەکەى بکەن و، وەڵامى پرسیارەکانى بدەنەوە.
