لە زانکۆى جیهان-هەولێر وۆرکشۆپێکى تایبەت بە سەربەخۆیی کوردستان بەڕێوەچوو

بەشی پەیوەندییە نێودەوڵەتی و دبلۆماسییەكان لە زانكۆی جیهان وۆرکشۆپێکى بۆ فێرخوازێکى خوێندنى باڵاى بەشی زانستە سیاسی و توێژینەوە ئەمنیەكانی زانكۆی نیكولاوس كۆپەرنیكوسی پۆڵەندی ڕێکخست.

لەو وۆرکشۆپەدا، کە ڕۆژی چوارشەممە ڕێکەوتى (٢٥/٥/٢٠٢٢) بە ناونیشانی (ئاسۆكانی داهاتوی پرسی كورد لە ڕۆژهەڵاتی ناوەڕاستدا) لە هۆڵى (VIP) زانکۆ بەئامادەبونى سەرۆک و ستافى بەشە زانستیەکانى زانکۆ بەڕێوەچوو، لە سەرەتادا ئەدریانا چارنێتكا کە تێزى دکتۆراکەى لەبارەى سەربەخۆیی کوردستانە، بابەتێکى بەناونیشانى (سەربەخۆی پایتەختی كوردستانی عێراق) پێشکەش کرد.

لەمیانەی خستنەڕووى بابەتەکەیدا باسى لە ڕێگە یاساییەکانى سەربەخۆبوون کرد، پاشان باسى لە  بارودۆخی سیاسی و كۆمەڵایەتی وئابوری كوردوستانی گەورە لە ئێران، توركیا، عێراق و سوریا کرد.  پاشان باسی لە هەوڵە مێژوویەكان كرد بۆ دامەزراندنی دەوڵەتی كوردی  و بەدیهێنانی مافی چارەی خۆنوسین. لە بەشێکى دیکەى بابەتەکەیدا باسى لە بارودۆخی دەستوری و یاسای حكومەتی هەرێمی كوردستانی کرد، لەگەڵ تیشك خستنە سەر  ئەو ئاڵنگاریانەی كە ئەكرێت بەهۆی بارودۆخی ناوخۆی و هەرێمی و نێودەوڵەتییەوە ڕووبەڕوی پرۆسەى سەربەخۆیی کوردستان ببێتەوە .

لە بەشی دووەمدا، پرۆفیسۆر دكتۆر خەلیل اسماعیل محمد  لە زانكۆی جیهان-هەولێر بابەتێکى بەناونیشانی (ڕۆڵە كاریگەرەكانی دەوڵەتانی هەرێمی لەسەر پرسی كورد) پێشکەشکرد، لەو چوارچیوەیەدا دكتۆر خەلیل تیشكی خستە سەر ئەو بەرەوپێشچونە سیاسیانەی كە لە ڕۆژهەڵاتی ناوەڕاستدا ڕویان داوە بەتایبەت لە دوای جەنگی جیهانى یەکەمەوە، هەروەک باسى ئەو بارودۆخانەى کرد، كە ناوچەكە بەهۆی ململانێى هێزە  نێودەوڵەتی و هەرێمییەكان بەخۆیەوە بینیوە، ئینجا باسى كاریگەریەكانی ئەو ململانێیە لەسەر پرسی كورد بە گشتی لە هەر چوار پارچەی كوردستان کرد. دواتر ئاماژەى بەهەوڵە لە مێژینەکانى هێزە سیاسییە كوردییەكان كرد بۆ دامەزراندنی كیانێكی سەربەخۆی كوردی.

ئادریان چارنێکا، کە فێرخوازى دکتۆرایە لە فاکەڵتی زانستە سیاسییەکان و توێژینەوەکانی ئاسایش لە زانکۆى نیکۆلاوس کۆپەرنیکۆس لە شارى (ToRUŃ)ى پۆڵندا، کە یەکێکە لە پێنچ زانکۆ پێشەنگەکانى ئەو وڵاتە، لە ئێستادا لە پرۆسەی نووسینی تێزی دکتۆراکەیەتى، کە تایبەت بەسەربەخۆیى کوردستانە بە ناونیشانی (Kurdish Independence Capital in the Middle East).

ئەو فێرخوازە بۆ ئەنجامدانى توێژینەوەکەى بەشێوەیەکى سەرکەوتوانە پێویستى بەهاوکارى و پاڵپشتى لە هەر چوار پارچەى کوردستان هەیە، لەو چوارچێوەیەشدا زانکۆى جیهان-هەولێر هەموو کارئاسانى و پاڵپشتیەکى زانستى و لۆجیستى بۆ دوپاتکردەوە، واش بڕیارە لە ماوەى مانەوەى لە هەرێمى کوردستان لە ڕێکەوتى (23/5 تا 3/6 /2022) بەهاوکارى زانکۆى جیهان-هەولێر بەوردى کار لەسەر ئەنجامدانى توێژینەوەکەى بکات، بۆ ئەو مەبەستەش زانکۆى جیهان-هەولێر داوا لە فێرخوازان و مامۆستایان و فەرمانبەران و هاوڵاتیانى هەرێمى کوردستان بەشێوەیەکى گشتى دەکات لە ڕێگەى ئەم بەستەرە (Survey for PhD research Kurdish Independence (google.com)) بەشدارى لە فۆرمى ڕاپرسى تایبەت بەتوێژینەوەکەى بکەن و، وەڵامى پرسیارەکانى بدەنەوە.