فێرخوازانى بەشى بایۆمیدیکاڵ بەشدارى لە چالاکیەکى تایبەت بە ڕۆژی جیهانیی چارەسەری سروشتی دەکەن

لە ڕۆژی جیهانیی چارەسەری سروشتیدا، ڕۆژی سێشەممە ڕێککەوتی ٨ی ئەیلوولی ٢٠٢٦، ژمارەیەک لە فێرخوازانى بەشی بایۆمیدیکاڵ لە زانکۆى جیهان-هەولێر بەشدارییان لە چالاکیەکى تایبەت بەو ڕۆژە لە نەخۆشخانەی ماجدی لە شاری هەولێر کرد.

لە چالاکییەکەدا، هەریەک لە فێرخوازان (ڕەحمە دلشاد عبد الهادي) و (خوڵە هاشم عزیز فائق) لە قۆناغی چوارەم و، (ڕەوا عبد الرحمن) و (ژینەر سامي) لە قۆناغی دووەم، ئامادەی دانیشتنەکە بوون و بەشدارییەکی کارایان لە وتوێژە زانستییەکاندا کرد.

دانیشتنەکە لەلایەن پزیشکانی پسپۆڕ، دکتۆرە ژاڵە کاک ئەمین مەولود، دکتۆرە شێلان فەیروز عارف و دکتۆرە ئالاء أسامة الطویل پێشکەش کرا، کە تیایدا تیشکیان خستە سەر چەندین بابەتی کلینیکی گرنگ، لەوانە هەوکردنی جومگەکان (Rheumatoid Arthritis)، هۆکارەکانی، نیشانە و دەستنیشانکردنی، لەگەڵ ڕۆڵی چارەسەری سروشتی لە کەمکردنەوەی نیشانەکان و باشترکردنی توانای وەزیفی لای نەخۆشان.

ئەم بەشداریکردنەى فێرخوازان بووە هۆکارێک بۆ لە نزیکەوە ئاشنابوون بە ئاستی زانیاریی کلینیکیی و، ڕەخساندنی دەرفەت بۆ بەدواداچوونی شێوازەکانی پەیوەندیکردن و پێشکەشکردنی زانستی لای پسپۆڕانی بوارەکە، جگە لە پەرەپێدانی تێگەیشتنیان بەرامبەر ڕۆڵی تیمە تەندروستییە فرە پسپۆڕییەکان لە پێشکەشکردنی چاودێریی گشتگیر بۆ نەخۆشان.