پەیامی پیرۆزبایی پرۆفیسۆر دکتۆر ئەمجەد سابر دەلۆ سەرۆکی زانکۆی جیهان-هەولێر بەبۆنەی یادی ٦٤ ساڵەی دامەزراندنی یەکێتیی مامۆستایانی کوردستان

ڕۆژى (١٥/٥)ى هەموو ساڵێک یادى دامەزراندنى یەکێتى مامۆستایانى کوردستانە ، بەو بۆنەیەوە پڕۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر لە پەیامێکدا پیرۆزبایی لە سەرۆک و ئەندامانی سکرتاریەت  و مامۆستایان دەکات، کە ئەمەش دەقەکەیەتى:

بۆ/ بەڕێزان لە مەکتەبی تەنفیزی و سکرتێر و ئەندامانی سکرتاریەت و سەرجەم ئەندامانی یەکێتیی مامۆستایانی کوردستان

سڵاوى زانست و خەبات

بەبۆنەی یادی (٦٤) ساڵەی دامەزراندنی یەکێتییە تێکۆشەرەکەتان، گەرمترین و جوانترین پیرۆزبایی ئاراستەی سکرتێر و ئەندامانی سکرتاریەت و سەرجەم مامۆستایانی ئازیزی کوردستان دەکەم.

یەکێتیی مامۆستایانی کوردستان لە مێژووی پڕ سەروەری خۆیدا، هەمیشە وەک قەڵایەکی خۆڕاگر و پیشەیی، ڕۆڵێکی کاریگەری هەبووە لە داکۆکیکردن لە مافە ڕەواکانی مامۆستایان و پەرەپێدانی پرۆسەی پەروەردە و خوێندن لە سەرجەم ناوەندەکانى خوێندن لە کوردستاندا. مامۆستایان وەک چرای ڕووناککەرەوەی کۆمەڵگە، لە هەموو قۆناغە سەختەکاندا، بە گیانێکی نیشتمانپەروەرانە بەردەوام بوون لە پێگەیاندنی نەوەی هۆشیار و زانستخواز.

ئێمە لە زانکۆی جیهان-هەولێر، وێڕای دەستخۆشی و ڕێزمان بۆ ماندووبوون و شەونخونی مامۆستایانی کوردستان، جارێکی دیکە جەخت لەسەر هەماهەنگی و پشتگیری خۆمان بۆ کار و چالاکییە پیشەییەکانی ئێوە دەکەینەوە، لەپێناو بەرزکردنەوەی ئاستی زانستی و باشترکردنی ژیانی مامۆستایان کە کۆڵەکەی سەرەکی ناوەندەکانى خوێندن و بونیادنانی هەر کۆمەڵگەیەکی پێشکەوتوون.

دووبارە ئەم یادە لە ئێوە و سەرجەم مامۆستایانی کوردستان پیرۆز بێت، هیوای سەرکەوتن و بەردەوامیتان بۆ دەخوازم لە کارە پیرۆزەکانتاندا.

پڕۆفیسۆر دکتۆر ئەمجەد سابر دەلۆیی

سەرۆکی زانکۆی جیهان-هەولێر

١٥/٥/٢٠٢٦