فێرخوازانی بەشی شیکاریی کیمیایی پزیشکی چالاکییەکی مرۆییی لە نەخۆشخانەی نانەکەلی بەڕێوەدەبەن

ڕۆژی سێ شەممە ڕێککەوتی 13/10/2026، گروپێک لە فێرخوازانی قۆناغی چوارەم لە بەشی شیکاری کیمیایی پزیشکی لە زانکۆی جیهان-هەولێر، سەردانێکی مرۆییانەیان بۆ نەخۆشخانەی نانەکەلی بۆ نەخۆشییەکانی شێرپەنجە لە شاری هەولێر ئەنجام دا.

سەردانەکە بە سەرپەرشتیی یاریدەدەری تاقیگە منار فراس جاسم بەڕێوەچوو، لە کاتی گەییشتنیاندا، فێرخوازان لەلایەن هوشەنگ جەمیل، لە نەخۆشخانەی نانەکەلی بە گەرمی پێشوازییان لێکرا.

دەستپێشخەرییە مرۆیی و دەروونییەکان بۆ منداڵان

پاشان فێرخوازان دەستیان بە چالاکیەکەیان کرد، بۆ ئەوەش لە سەرەتای چالاکییەکەدا، فێرخوازان چەندین بڕگەی هۆشیاری و دەروونییان پێشکەشى ئەو منداڵانە کرد، کە چارەسەری کیمیایی (Chemotherapy) وەردەگرن، بە مەبەستی بەرزکردنەوەی ورەی دەروونییان و کەمکردنەوەی فشاری نەخۆشخانە.

 لە لایەکی دیکەوە، فێرخوازان چالاکیی جۆراوجۆری وێنەکێشان، یاریی فێرکاری و دابەشکردنی دیاریی هێماییان بەڕێوەبرد، لەگەڵ دروستکردنی تابلۆیەکی هونەری بەناونیشانی «دارەی بیرەوەری»، کە تێیدا منداڵان بە پەنجەمۆرەکانی خۆیان ڕەنگیان بەشیاوی تابلۆکە بەخشی وەک یادگارییەکی ئەرێنی.

کۆتایی چالاکییەکە و ڕێزلێنان

لە کۆتایی سەردانەکەدا، هوشەنگ جەمیل، سوپاس و پێزانینی خۆی ئاڕاستەی شاندی فێرخوازانى زانکۆی جیهان-هەولێر کرد بۆ ئەم هەنگاوە مرۆییە و، هانى فێرخوازانیدا چالاکیی زیاتری دەروونی و پاڵپشتیکاری لە ئایندەدا بۆ چارەسەرخوازان ئەنجام بدەن.