پرۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر لەگەڵ زانکۆى سۆفیاى ژاپۆنى پەیوەندى زانستى دروست دەکات
لە بەردەوامى دیدار و کۆبونەوەکانى لەگەڵ زانکۆ ڕەسەن و ئاستبەرزەکانى وڵاتانى جیهان، رۆژى دووشەممە ڕێکەوتى (٢٧/١١/٢٠٢٣) پرۆفیسۆر دکتۆر ئەمجەد سابر دەلۆ سەرۆکى زانکۆى جیهان-هەولێر لەگەڵ پرۆفیسۆر دکتۆر یۆشیاکی میتسومیچی (TERUMICHI YOSHIAKI) سەرۆکى زانکۆى سۆفیاى ژاپۆنى دیدارێکى گرنگى ئەنجامدا.
لەو دیدارەدا؛ کە لە پەراوێزى کۆنفرانسی نێودەوڵەتى زانکۆکان لە قەتەر بەڕێوەچوو، سەرۆکى زانکۆى جیهان-هەولێر و سەرۆکى زانکۆى سۆفیا گفتوگۆی هەمەلایەنەیان لە بارەى دامەزراندنى پەیوەندییە زانستى و ئەکادیمیەکانى نێوان زانکۆکانیان کرد، بە تایبەت لە ڕێکخستنى چالاکى زانستى وەک کۆنفرانسى نێودەوڵەتى و ئەنجامدانى توێژینەوەى هاوبەش و سوود وەرگرتن لە ئەزمونى یەکتر لە ڕێگەى ئاڵوگۆڕى ستافى زانستى و فێرخوازان، بۆ ئەو مەبەستەش بڕیاردرا لە ئایندەیەکى نزیکدا شاندنى هەردوو زانکۆ بەجیا سەردانى یەکتر بکەن و، لە نزیکەوە گفتوگۆ لەبارەى وردەکارى کارە هاوبەش و جێى بایەخى نێوانیان بکەن، لە پێناو ڕێگەخۆشکردن بۆ واژۆکردنى ڕێککەوتنمایەکى هاوبەش و ئەنجامدانى کارى پێکەوەیی.
واش بڕیارە کۆنفرانسی نێودەوڵەتى زانکۆکان ساڵى داهاتوو لەلایەن کۆمەڵەى نێودەوڵەتى زانکۆکان (IAU) لە زانکۆى سۆفیا (Sophia University) لە ژاپۆن بە بەشدارى ئەندامانى کۆمەڵەکە و سەرۆکى زانکۆکان بەڕێوەبچێ و، زانکۆى جیهان-هەولێریش وەک زانکۆیەکى ئەندامى کۆمەڵەکە بەشاندێک بەشدارى بکات.
