چالاکییەکی هۆشیاریی تەندروستی دەربارەی شێرپەنجەی مەمک لەلایەن فێرخوازانی بەشی پەروەردەی گشتیی بەڕێوەچوو

ڕۆژی یەکشەممە ڕێککەوتی 18/10/2026، گرووپێک لە فێرخوازانی قۆناغی سێیەم لە بەشی پەروەردەی گشتی لە زانکۆی جیهان-هەولێر، بە سەرپەرشتیی مامۆستا دەشنێ عەبدوڵڵا سەعید چالاکییەکی هۆشیاریی تەندروستییان دەربارەی شێرپەنجەی مەمک (Breast Cancer) لە پارکی سامی عەبدولڕەحمان و Pink Cafe ئەنجام دا.

 پێشکەشکردنی ڕێنماییەکان و هۆشیارکردنەوەی هاووڵاتییان

چالاکییەکە لەلایەن فێرخوازانی قۆناغی سێیەم: گەشبین غفور، هاوناز کریم، ئیسراء کیفی، نوسیبە عبدالمجید و سەحەر عەجید بەڕێوەچوو. لە بڕگەی یەکەمدا، فێرخوازان کارتی زانیاری و ڕێنماییان بە دوو زمانی کوردی و ئینگلیزی بەسەر هاووڵاتییاندا دابەش کرد، کە نیشانەکانی شێرپەنجەی مەمک و شێوازی خۆپشکنینی پرۆسەیی (Self-Examination)ی لەخۆ دەگرت.

 لە هەمان چوارچێوەدا، فێرخوازان بۆ هاووڵاتییانیان ڕوون کردەوە کە دەستنیشانکردنی پێشوەختە (Early Detection) دەرفەتەکانی چارەسەری سەرکەوتوو زۆرتر دەکات.

 دەستپێشخەرییە کۆمەڵایەتی و دەروونییەکان

لە بەشێکى دیکەی چالاکییەکەدا، فێرخوازان تابلۆیەکی تایبەتیان بۆ پشتیوانیی دەروونی ئامادە کردبوو، کە تێیدا بەشداربووان پەنجەمۆری خۆیان وەک هێمایەک بۆ هاوسۆزی جێهێشت.

سەرباری ئەوەش، بەشداربووان پەیامی هیوابەخشیان نووسی و خستیانە ناو گوڵدانێکی شووشەیییەوە، بە مەبەستی ڕەخساندنی پاڵپشتیی کۆمەڵایەتی و دەروونی بۆ کەسانی تووشبوو.

 ئەنجامی ئامانجە دەستنیشانکراوەکان

لە کۆتایی چالاکییەکەدا، فێرخوازان جەختیان لەسەر سێ ئامانجی بنەڕەتی کردەوە: بەرزکردنەوەی هۆشیاریی تەندروستی، ئەنجامدانی پشکنینی پێشوەختە و، دابینکردنی پشتیوانیی دەروونی و کۆمەڵایەتی بۆ کەسانی تووشبوو بە شێرپەنجەی مەمک. پاشان چالاکییەکە بە سەرکەوتوویی کۆتایی پێهات و هاوڵاتیان و گەشتیارانى پارکەکەش پێشوازییەکى زۆریان لە فێرخوازان کرد.