فێرخوازانی بەشی ڕاگەیاندن لە شاری هەولێر بەشداریی لە چالاکییەکی ئەدەبییدا دەكەن

ڕۆژی پێنجشەممە، ڕێکكەوتی 12ـی تشرینی دووەمی 2026، بە سەرپەرشتیی مامۆستای یاریدەدەر ئەحمەد جەمال حەمەکەریم، ژمارەیەک لە فێرخوازانی قۆناغی دووەم، سێهەم و چوارەمی بەشی ڕاگەیاندنی زانکۆی جیهان ـ هەولێر بەشدارییان لە چالاکییەکی ئەدەبی و ڕۆشنبیری کرد کە  لە هۆڵی كۆنفڕانسی ناوەندی گەنجان لە هەولێر بەڕێوەچوو.

ئەم چالاکییە لەلایەن ماڵی وەفایی، ناوەندی گەنجان و كوردستان كڕۆنیكەڵ ڕێکخرابوو و تایبەت بوو بە ناساندنی ڕۆمانی (کۆنسێرت بۆ کەڕان) لە نووسینی ڕۆماننووس (هنێر سەلیم). هەریەكە لە فێرخوازان سەرکار حوسێن و یوسف ئەحمەد لە قۆناغی چوارەم، محەممەد سەرمەد لە قۆناغی سێهەم، هەروەها ڕائد محەممەد، محەممەد ئەیاد و دلزار زرار لە قۆناغی دووەم ئامادەی چالاكییەكە بوون.

لە سەرەتای چالاکییەکەدا، ڕێبین فەتاح، بەڕێوەبەری ناوەندی ماڵی وەفایی، باسی لە وەرگێڕان و چاپکردنی ڕۆمانی (کۆنسێرت بۆ کەڕان) کرد و ڕوونی کردەوە کە ئەم بەرهەمە لە نووسینی هنێر سەلیم، وەرگێڕانی ڕێبین فەتاح و چاپكردنی ماڵی وەفاییە. هەروەها، ئاماژەی بەو قۆناغانە دا کە لەگەڵ نووسەری ڕۆمانەکە کاریان لەسەر کردووە، تا بەرهەمێکی شایستە و جێی ڕەزامەندیی خوێنەران پێشکەش بکرێت.

دواتر، هنێر سەلیمیش باسی لە هۆکارەکانی نووسینی ڕۆمانەکە کرد و هەندێک لە بیرۆکە و پاشخانەکانی ئەو دەقە ئەدەبییەی خستەڕوو. لە ناوەڕۆکی چالاکییەکەدا، ئاماژە بەوە درا کە ڕۆمانی (کۆنسێرت بۆ کەڕان) پرسیارگەلێکی گرنگ دەخاتەڕوو سەبارەت بە ئازادی، شووناس، زمان، هونەر و بەرپرسیارێتیی مرۆڤ.

چالاکییەکە بە ئامادەبوونی ژمارەیەکی بەرچاو لە نووسەر، ڕۆشنبیر و ئارەزوومەندانی بواری ئەدەب بەڕێوەچوو. لەنێوان ئامادەبوواندا، میران ئەبراهام و جان دۆست، وەک دوو لە ڕۆماننووسە ناسراوەکانی کورد، بەشدارییان کرد. هەروەها، ژمارەیەک لە ڕەخنەگرانی بواری ئەدەب خوێندنەوە و تێبینیی خۆیان لەسەر ڕۆمانەکە پێشکەش کرد، کە تیشکیان خستە سەر ناوەڕۆک، هونەری گێڕانەوە، زمان و ئەو پەیامە مرۆیی و نەتەوەییانەی کە ڕۆمانەکە لەخۆ دەگرێت.

لە كۆتایی چالاكییەكەدا، بەشداربووان سەرنج و بۆچوونەکانی خۆیان لەسەر ناوەڕۆکی کتێبەکە خستەڕوو و گفتوگۆیەکی ئەدەبی و ڕۆشنبیریی بەرێوەچووو، ئەوەش بووە هۆی ڕەخساندنی بوارێکی گونجاو بۆ ئاڵوگۆڕی بیر و بۆچوون لەنێوان نووسەر، وەرگێڕ، ڕەخنەگر و خوێنەراندا.