گروپێک لە فێرخوازانی بەشی ڕاگەیاندن پیشانگەیەكی هونەری لە شاری هەولێر بەسەر دەكەنەوە

ڕۆژی پێنجشەممە، ڕێککەوتی 12ـی تشرینی دووەمی 2026، بە سەرپەرشتیی مامۆستای یاریدەدەر (ئەحمەد جەمال حەمەکەریم)، ژمارەیەک لە فێرخوازانی قۆناغی دووەم و چوارەمی بەشی ڕاگەیاندنی زانکۆی جیهان ـ هەولێر پیشانگەیەكی هونەرییان لە  گەلەریی ناوەندی گەنجان لە شاری هەولێر بەسەرکردەوە.

 پیشانگە هونەرییەكە بەناونیشانی (ڕۆبێرتۆ ساڤیانۆ) كرابووەوە؛ تایبەت بوو بە بەرهەمە هونەرییەکانی هونەرمەند، نووسەر و مامۆستای زانکۆ دكتۆر فەرهاد پیرباڵ. لەو چوارچێوەیەدا هەریەکە لە فێرخوازان سەرکار حوسێن و یوسف ئەحمەد لە قۆناغی چوارەم، هەروەها ڕائد محەممەد، محەممەد ئەیاد و دڵزار زرار لە قۆناغی دووەم، ئامادەی پیشانگەکە بوون و لە نزیکەوە ئانشاى بە بەرهەمە هونەرییەکانی د.فەرهاد پیرباڵ بون.

لە پیشانگەکەدا، کۆمەڵێک تابلۆ و بەرهەمی شێوەکاریی دكتۆر فەرهاد پیرباڵ نمایش كرابوون، کە بە شێوازێکی هونەریی جیاواز و بە بەکارهێنانی ڕەنگ، هێڵ و شێوەی هێمایی درووست كێشرابوون. بەرهەمەکان جۆراوجۆرییەکی هونەرییان پیشان دەدا و تێیاندا وێنەی مرۆڤ، دەموچاو، چاو و شێوە ئەبستراکتەکان بە ڕەنگ و پێکهاتەی جیاواز بەرجەستە کرابوون. لە بەشێک لە تابلۆکاندا، تێکەڵکردنی ڕەنگە جیاوازەکان و بەکارهێنانی هێڵە سادە و ئاڵۆزەکان سەرنجڕاکێش بوو، کە دەرفەتی خوێندنەوە و لێکدانەوەی هونەریی جیاواز بۆ بینەران دەڕەخساند.

هەروەها، لە پیشانگەکەدا بەرهەمە چاپکراوەکانی دكتۆر فەرهاد پیرباڵیش دانرابوون، کە تایبەت بوون بە بوارەکانی ئەدەب و هونەر. ئەمەش دەرفەتێکی بۆ سەردانکەران ڕەخساند تا لە تەنیشت بەرهەمە شێوەکارییەکان، ئاشنای بەشێکی دیکە لە کار و بەرهەمە ئەدەبی و هونەرییەکانی ببن.

لە ماوەی بەشدارییان لە پیشانگەکەدا، فێرخوازانی بەشی ڕاگەیاندن گەشتێکیان بەناو بەشە جیاوازەکانی گەلەرییەکەدا ئەنجام دا و لە نزیکەوە سەیری تابلۆ و بەرهەمە هونەرییەکانی دكتۆر فەرهاد پیرباڵیان كرد.