فێرخوازانی بەشی پەروەردەی گشتی سەردانى سەنتەری تایبەتمەندی شێرپەنجەی مەمک دەکەن

زانیارییە سەرەکییەکان: ڕۆژی سێشەممە ڕێککەوتی 20/10/2026، گروپێک لە فێرخوازانی قۆناغی سێیەم لە بەشی پەروەردەی گشتی لە زانکۆی جیهان-هەولێر، بە سەرپەرشتیی مامۆستا دەشنێ عەبدوڵڵا سەعید سەردانێکی مەیدانییان بۆ سەنتەری تایبەتمەندی شێرپەنجەی مەمک بەڕێوەبرد.

 دەستپێکی سەردانەکە: لە کاتی گەییشتنیاندا، فێرخوازان لەلایەن دکتۆرە سامیا جەلال، پزیشکی پسپۆڕ بە گەرمی پێشوازییان لێکرا، پاشان لە وتەیەکیدا ڕوونی کردەوە کە دیارترین نیشانەکانی نەخۆشییەکە بریتین لە دروستبوونی گرێ یان وەرەم لە ناوچەی مەمک یان ژێر باڵ، گۆڕانی قەبارە و ناڕێکبوونی پێست.

سەرباری ئەوەش، پزیشکی پسپۆڕ جەختی لەسەر پشکنینی خۆیی مانگانە (Self-Examination) کردەوە و ئامۆژگاریی هاووڵاتییانی کرد بۆ ڕاگرتنی کێشی تەندروست، دوورکەوتنەوە لە جگەرەکێشان و خواردنەوە و، هاندانی شیردانی سروشتی.

 ئەنجامی سەردانەکە دیدارەکە بە پرسیاری زیاتر دەربارەی بڵاوکردنەوەی هۆشیاریی تەندروستی کۆتایی هات. لە کۆتاییدا، مامۆستا دەشنێ عەبدوڵڵا سەعید و فێرخوازانی بەشی پەروەردەی گشتی سوپاس و پێزانینی خۆیان ئاڕاستەی دکتۆرە سامیا جەلال کرد بۆ زانیارییە بەنرخەکانی.