فێرخوازانی بەشی بایۆمیدیکاڵ هۆشیاری لەبارەی پاکوخاوێنیی دەستەکان لە ڕۆژی جیهانیی شۆردنی دەستەکاندا بڵاودەکەنەوە

ڕۆژی پێنجشەممە ڕێککەوتی 15/10/2026، گروپێک لە فێرخوازانی قۆناغی چوارەم لە بەشی بایۆمیدیکاڵ لە زانکۆی جیهان–هەولێر چالاکییەکی هۆشیاریی تەندروستییان لە پارکی سامیی عەبدولڕەحمان لە هەولێر بە بۆنەی ڕۆژی جیهانیی شۆردنی دەستەکانەوە بەڕێوەبرد.

چالاکیەکە بە سەرپەرشتیی مامۆستای یاریدەدەر هێرۆ ئیسماعیل محەمەد بەڕێوەچوو، لە میانەى چالاکییەکەیاندا، فێرخوازان میهرەبان صدیق ڕەحمان، سۆندوس هێوا قرەنی، و خەولە هاشم عزیز بەشدارییان کرد لەگەڵ سەردانیکەرانی پارکەکە کۆبوونەوەو، بڵاوکراوەی پەروەردەیی و پەڕۆی تەڕیان (Wet wipes) دابەش کرد.

هاوکات لە میانەى بەسەرکردنەوەى هاوڵاتیان و ڕێبواران و سەردانیکەرانى پارکەکە، فێرخوازانى زانکۆى جیهان-هەولێر ڕوونکردنەوەی گرنگیان لەبارەى شۆردنی دروستی دەستەکان لە خۆپاراستن لە نەخۆشییە گوازراوەکان پێشکەشکردن.

جگە لەوانەش، فێرخوازان باسیان لەوە کرد چۆن زیندەوەرە وردەکان دەتوانن دەستەکان پیس بکه ن و، لە کەسێکەوە بۆ کەسێکی دیکە پەتا و ڤایرۆس و نەخۆشیەکان بگوازرێنەوە و ببنە هۆی نەخۆشی. هەروەها ڕێگەی دروستی شۆردنی دەستەکانیان بە ئاو و سابوون بۆ ماوەی لانی کەم 30 چرکە شیکردەوە، بە جەختکردنەوە لەسەر گرنگیی شۆردنی بەردەوامی دەستەکان بەتایبەتی بەر لە خوارن و دوای بەکارهێنانی ئاودەست.